නේපාලයේ මෑතකදී වාර්තා වූ ස්වභාවික ඛේදවාචකය වැනි බරපතල විපත් කුඩා පරිමාණයෙන් හෝ ශ්රී ලංකාව තුළ ඕනෑම මොහොතක සිදුවිය හැකි බවට පේරාදෙණිය විශ්වවිද්යාලයේ භූගර්භ හා භූ විද්යා අධ්යයන අංශයේ හිටපු ජ්යෙෂ්ඨ මහාචාර්ය අතුල සේනාරත්න මහතා දැඩි අනතුරු ඇඟවීමක් සිදු කර තිබේ. ජාත්යන්තර මට්ටමින් සිදුවන මෙවැනි ව්යසනකාරී සිදුවීම් මෙරට භූගර්භීය හා කාලගුණික තත්ත්වයන් සමඟ සැසඳීමේදී එය ජාතික මට්ටමින් දැඩි අවධානයට යොමු විය යුතු කාරණයක් බව මෙමඟින් මනාව පැහැදිලි වේ.
මෑතකදී ශ්රී ලංකාවට බලපෑ ‘දිට්වා’ සුළි කුණාටු තත්ත්වය අතරතුර සරසවිගම ප්රදේශයේ හටගත් නායයාම මෙම අවදානමේ ස්වභාවය පෙන්වා දෙන කදිම නිදසුනක් බව මහාචාර්යවරයා පෙන්වා දෙයි. එම නායයාම හේතුවෙන් ප්රදේශයේ ප්රධාන ඇළ මාර්ගයක් අවහිර වීමෙන් සම්පූර්ණ ගම්මානයක් ජලයෙන් යටවී පුද්ගලයින් විස්සකට අධික සංඛ්යාවක් ජීවිතක්ෂයට පත්වීම මෙරට ක්ෂණික ව්යසන අවදානම තවදුරටත් තහවුරු කරයි. ගංගා සහ ඇළ දොළ ආසන්නයේ පිහිටි දිරාපත් වූ පාෂාණ සහ අස්ථායී පස් තට්ටු කඩා වැටීමෙන් ජල මාර්ග අවහිර වී, ඒවායින් එකතු වන දැවැන්ත ජල කඳ හදිසියේ පහළට ගැලීමෙන් මෙවැනි මහා පරිමාණ ජලගැලීම් නිර්මාණය වීමේ ඉහළ අවදානමක් පවතී.
මෙම තත්ත්වය හමුවේ අදාළ බලධාරීන් සහ ජනතාව කඩිනමින් අවදි විය යුතු අතර, ස්වභාවික විපත්වලට ඔරොත්තු දෙන ආකාරයේ ක්රමවත් පූර්ව අනතුරු ඇඟවීමේ සහ ආරක්ෂක යාන්ත්රණයක් සකස් කිරීම ජාතික අවශ්යතාවක් බවට පත්ව ඇත. විශේෂයෙන්ම අවදානම් සහිත ප්රදේශවල ජනතාව දැනුවත් කිරීම සහ හදිසි ජල ගැලීම් පාලනය සඳහා ක්රමවත් ජල ධාරා කළමනාකරණ වැඩපිළිවෙළක් ක්රියාත්මක නොකළහොත්, ඉදිරියේදී මෙරටට තවත් බරපතල මානව හා දේපළ හානි රැසකට මුහුණ දීමට සිදුවනු ඇත.
