පවතින එල් නිනෝ කාලගුණ තත්ත්වය හේතුවෙන් මොණරාගල දිස්ත්‍රික්කයේ ප්‍රදේශ ගණනාවකට උග්‍ර පානීය ජල හිඟයක් මතුවී ඇති අතර, ඊට පිළියමක් ලෙස දිස්ත්‍රික්කය පුරා ඇති නළ ලිං අලුත්වැඩියා කිරීමේ විශේෂ වැඩපිළිවෙළක් ආරම්භ කර තිබේ. භාවිතයෙන් ඉවත් කර තිබූ හඳුනාගත් නළ ලිං 267ක් පිරිපහදු කර, ජලය පරීක්ෂා කොට ජනතාවගේ පරිභෝජනයට ලබාදීමට නියමිත අතර, මීට අමතරව නව නළ ලිං 100ක් ඉදිකිරීමටද පියවර ගෙන ඇත. මෙම ව්‍යාපෘතියේ ප්‍රථම අදියර (අගෝස්තු 29 දින) මොණරාගල ප්‍රාදේශීය ලේකම් කොට්ඨාශයට අයත් මාගන්දන මුල්ල රත්තනපිටිය ප්‍රදේශයෙන් සහ වැලියාය ග්‍රාම නිලධාරී වසමෙන් ආරම්භ කරන ලදී.
නිවාස හා ජල සම්පත් අමාත්‍යාංශයේ ප්‍රතිපාදන යටතේ ජල සම්පාදන මණ්ඩලයේ භූගත ජල අංශය මගින් මෙම නඩත්තු කටයුතු සිදු කරන අතර, මුල් අදියර සඳහා මිලියන 17ක පිරිවැයක් යොදවනු ලැබේ. මොණරාගල දිස්ත්‍රික්කයේ ප්‍රාදේශීය ලේකම් කොට්ඨාශ 8ක ග්‍රාම වසම් 75ක පවුල් 15,000කට අධික පිරිසකට (පුද්ගලයින් 45,000කට වැඩි) නියඟයෙන් බලපෑම් එල්ල වී ඇති අතර, මැදගම සහ සියඹලාණ්ඩුව ප්‍රදේශවලට වැඩිම බලපෑමක් එල්ල වී තිබේ. පානීය ජල හිඟයට තාවකාලික පිළියමක් ලෙස ආපදා සහන සේවා අංශ සහ ප්‍රාදේශීය සභා මගින් බවුසර් 39ක් යොදා ගනිමින් ජලය බෙදා හැරීමේ කටයුතු අඛණ්ඩව සිදු කෙරේ. මෙම සමාරම්භක අවස්ථාව සඳහා වෙළඳ වාණිජ ආහාර සුරක්ෂිතතා නියෝජ්‍ය අමාත්‍ය R.M. ජයවර්ධන, මොණරාගල ප්‍රාදේශීය සභාවේ සභාපති ජනක පුෂ්පකුරුප්පු ඇතුළු රාජ්‍ය නිලධාරීන් සහ ප්‍රදේශවාසීන් පිරිසක් එක්ව සිටියහ.
