ශ්රී ලංකාවේ බලශක්ති ගබඩාකරණ තාක්ෂණයන් වෙළෙඳපොළ වෙත සමීප කරවමින්, පර්යේෂකයන් සහ ආයෝජකයන් එකම වේදිකාවකට කැඳවීම අරමුණු කරගත් ජාතික නව්යකරණ නියෝජිතායතනයේ (NIA) “Emerging Graphite & Carbon Technologies for Energy Storage” තේමා කරගත් 3 වන ඩොල්ෆින් ටෙක්පිච් (Dolphin TechPitch) වැඩසටහන කොළඹදී පවත්වන ලදී.
මෙම වැඩසටහනේදී ශ්රී ලංකාව තුළ සංවර්ධනය කරන ලද ප්රධාන නවෝත්පාදන තාක්ෂණයන් තුනක් ඉදිරිපත් කරනු ලැබීය. ඒ අතර ජාතික මූලික අධ්යයන ආයතනයේ (NIFS) මහාචාර්ය G.R.A. කුමාර මහතා ප්රමුඛ කණ්ඩායම හඳුන්වා දුන් ජෛව ස්කන්ධ අපද්රව්ය බලශක්ති ගබඩාකරණ ද්රව්ය බවට පත් කිරීමේ තාක්ෂණය, කාර්මික තාක්ෂණ ආයතනයේ (ITI) ආචාර්ය ආර්. චින්තක ද සිල්වා මහතා ඇතුළු කණ්ඩායම විසින් ඊයම්-අම්ල බැටරි කාර්යසාධනය ඉහළ නැංවීම සඳහා සංවර්ධනය කළ උසස් බැටරි ඉලෙක්ට්රෝඩ තාක්ෂණය සහ ශ්රී ලංකාවට ආවේණික ශිරා ග්රැෆයිට් සඳහා ඉහළ වටිනාකමක් එක් කරන NIFS හි දිවංගත ආචාර්ය අතුල විජේසිංහ මහතා ඇතුළු කණ්ඩායමේ තාක්ෂණය වේ.
තාක්ෂණ සංවර්ධකයන් සහ වෙළෙඳපොළ අතර සෘජු සම්බන්ධතා ඇති කරමින්, ඉදිරිපත් කළ තාක්ෂණයන්හි වාණිජමය හා තාක්ෂණික දෘෂ්ටිකෝණ පිළිබඳව ආයෝජකයන් සමඟ සෘජු සාකච්ඡා පැවැත්වීමටද මෙහිදී අවස්ථාව සලසා දෙන ලදී. විද්යා හා තාක්ෂණ අමාත්යාංශයේ වැඩබලන ලේකම් මහේෂ් ගම්මන්පිල සහ ජාතික නව්යකරණ නියෝජිතායතනයේ ප්රධාන නව්යකරණ නිලධාරී ආචාර්ය මුදිත සෙනරත් යාපා යන මහත්වරුන් ඇතුළු පිරිසක් මෙම අවස්ථාවට එක්වූහ.
