ඩිජිටල් රක්ෂණ කාඩ්පත් (Digital Insurance Cards) පරීක්ෂා කිරීම සම්බන්ධයෙන් පොලිස්පතිවරයා විසින් ලබාදී ඇති උපදෙස් සහ මාර්ගෝපදේශ උල්ලංඝනය කරමින්, රියදුරන් අපහසුතාවයට පත්කිරීම බරපතළ රාජකාරි පැහැරහැරීමක් බව රථවාහන පාලන හා මාර්ග ආරක්ෂාව දිසාව භාර නියෝජ්ය පොලිස්පති ඩබ්ලිව්.පී.ජේ. සේනාධීර මහතා පවසයි.
අද (03) පැවති මාධ්ය හමුවකට එක්වෙමින් නියෝජ්ය පොලිස්පතිවරයා සඳහන් කළේ, පාදුක්ක සහ ගම්පහ යන පොලිස් ස්ථානවල නිලධාරීන් කිහිපදෙනෙකු ඩිජිටල් රක්ෂණ කාඩ්පත් පිළිගැනීම ප්රතික්ෂේප කරමින් මහජනතාව පීඩාවට පත්කළ බවට වාර්තා වී ඇති බවයි. 2006 අංක 19 දරන විද්යුත් ගනුදෙනු පනත (Electronic Transactions Act) ප්රකාරව ඩිජිටල් රක්ෂණ කාඩ්පත් සඳහා පූර්ණ නීතිමය පිළිගැනීම හිමිවන අතර, රක්ෂණ නියාමන කොමිෂන් සභාව විසින් අනුමත කර ඇති මෙරට ප්රමුඛ රක්ෂණ ආයතන 14ක් මගින් නිකුත් කරනු ලබන ඩිජිටල් රක්ෂණ කාඩ්පත් නිල වශයෙන් පිළිගන්නා ලෙස දිවයිනේ සියලුම පොලිස් ස්ථාන වෙත දැනුම් දී ඇත.
රියදුරෙකු සතුව ඩිජිටල් රක්ෂණ කාඩ්පත නොමැති අවස්ථාවකදී වුවද, රක්ෂණාවරණය සක්රියද යන්න තහවුරු කරගැනීම සඳහා පහත නොමිලේ සපයන ක්රමවේද භාවිත කළ හැකිය:
*1338# ඇමතීමෙන් රක්ෂණ අංකය හෝ වාහන අංකය ඇතුළත් කර ක්ෂණිකව තොරතුරු ලබාගැනීම.
1338 අංකයට කෙටි පණිවුඩයක් (SMS) යැවීම.
1338 ක්ෂණික ඇමතුම් මධ්යස්ථානය (Call Center) ඇමතීම.
මේ හේතුවෙන් දිවයින පුරා පිහිටි පොලිස් ස්ථාන 607හිම ස්ථානාධිපතිවරුන් මාර්ගයෙන් පහළ නිලධාරීන් නැවත දැනුවත් කිරීමට පියවර ගෙන ඇති අතර, යම් නිලධාරියෙකු එය ප්රතික්ෂේප කරන්නේ නම් ළඟම පිහිටි පොලිස් ස්ථානාධිපතිවරයාට හෝ රථවාහන මූලස්ථානයේ 070 47 55 600 යන විශේෂ දුරකථන අංකයට පැමිණිලි කරන ලෙස මහජනතාවගෙන් ඉල්ලා සිටියි.
