වාහන ආනයන සීමා ලිහිල් වීමත් සමඟ ශ්රී ලංකා මෝටර් රථ වෙළඳපොළේ විශාල ව්යුහාත්මක වෙනසක් සිදුවෙමින් පවතින අතර, යතුරුපැදි සහ ත්රිරෝද රථ හැරුණු කොට පුද්ගලික මෝටර් රථ කාණ්ඩයේ ප්රමුඛයා බවට චීන වාහන පත්වෙමින් තිබේ. දශක ගණනාවක් තිස්සේ වෙළඳපොළේ ආධිපත්යය දැරූ ජපාන සහ යුරෝපා වාහන ආනයනය සීඝ්රයෙන් පහත වැටෙද්දී, චීන නිෂ්පාදිත වාහන සඳහා පවතින ඉල්ලුම ඉහළ ගොස් ඇත.
ජපාන සහ යුරෝපා වාහනවල මිල ගණන් අධික ලෙස ඉහළ යාම හමුවේ මධ්යම පාන්තික ගැනුම්කරුවන් වැඩි වශයෙන් චීන වාහන වෙත නැඹුරු වී තිබේ. ජපාන නිෂ්පාදිත මෝටර් රථයක මිලට වඩා සියයට 30ක් හෝ 40ක් පමණ අඩු මිලකට නවීන තාක්ෂණික උපාංගවලින් සමන්විත චීන මෝටර් රථයක් මිලදී ගැනීමට හැකිවීම මෙම නැඹුරුවට ප්රධාන හේතුවයි. නිදසුනක් ලෙස, ජපාන නිෂ්පාදිත මධ්යම ප්රමාණයේ SUV රථයක් රුපියල් මිලියන 25 – 30ත් අතර මිලකට අලෙවි වෙද්දී, ඊට සමාන පහසුකම් සහිත චීන SUV රථයක් රුපියල් මිලියන 12 – 18ත් අතර මිලකට ලබා ගැනීමට හැකි වී තිබේ.
විශේෂයෙන්ම චීනයේ නිෂ්පාදිත විදුලි මෝටර් රථ මෙරට මධ්යම පාන්තික වෘත්තිකයන් අතර අතිශය ජනප්රිය වී ඇති අතර, මීට පෙර වෙළඳපොළේ සියයට 60කට වඩා වැඩි කොටසක් හිමිකරගෙන සිටි ජපාන සන්නාමයන්ගේ නව වාහන ආනයනය සියයට 40ක් පමණ දක්වා පහත වැටී ඇත. ජාත්යන්තර මට්ටමේ ආරක්ෂිත ප්රමිතීන් සහ වසර 5කට වැඩි වගකීම් කාලසීමාවන් ලබා දීම හේතුවෙන් චීන වාහනවල ගුණාත්මකභාවය පිළිබඳ පාරිභෝගිකයන් තුළ පැවති සැකය මේ වන විට පහව ගොස් තිබේ. යුරෝපා වාහන තවමත් සුඛෝපභෝගී කාණ්ඩයේ තම ස්ථානය රැකගෙන සිටියද, සාමාන්ය පාරිභෝගික වෙළඳපොළ තුළ ඒවායේ දායකත්වය අවම මට්ටමකට ඇද වැටී ඇති අතර, ඉදිරි වසර කිහිපය තුළ මෙරට මාර්ග පද්ධතිය තුළ චීන වාහනවල දායකත්වය තවදුරටත් ඉහළ යනු ඇතැයි ආර්ථික විශ්ලේෂකයෝ අනාවැකි පළ කරති.
