නිල සංචාරයක් සඳහා භූතානයේ සංචාරය කරන අග්රාමාත්ය ගරු ආචාර්ය හරිනි අමරසූරිය, භූතාන අග්රාමාත්ය කාර්යාලය සහ එක්සත් ජාතීන්ගේ සංවර්ධන වැඩසටහන (UNDP) විසින් (සැප්තැම්බර් 04) සංවිධානය කරන ලද භූතාන නවෝත්පාදන විද්යාගාරය (Bhutan Innovation Lab – BIL) පිළිබඳ විශේෂ වැඩසටහනකට සහභාගී වී තිබේ.
නවෝත්පාදන, ව්යවසායකත්වය සහ තාක්ෂණය උපයෝගී කර ගනිමින් රාජ්ය පාලනය පරිවර්තනය කිරීම සහ ආර්ථික සංවර්ධනය වේගවත් කිරීම මෙහි ප්රධාන අරමුණ වේ. භූතාන අග්රාමාත්යවරයාගේ මෙහෙයවීම යටතේ ක්රියාත්මක වන මෙම විද්යාගාරය, රාජ්ය ප්රතිපත්ති සම්පාදකයන් සහ ව්යවසායකයන් එකම වේදිකාවකට ගෙන එමින් නව අදහස් සංකල්ප මට්ටමේ සිට ප්රායෝගික මට්ටමට ගෙන ඒමට පහසුකම් සපයයි. භූතානයේ ආර්ථික මාර්ග සිතියම ක්රියාත්මක කිරීම සහ ඩිජිටල් විසඳුම් ඔස්සේ රාජ්ය සේවා කාර්යක්ෂම කිරීම සම්බන්ධයෙන් මෙහිදී පුළුල් ලෙස සාකච්ඡා කෙරිණි.
මෙහිදී ශ්රී ලංකාව නියෝජනය කරමින් අදහස් දැක්වූ අග්රාමාත්යවරිය, 2019 වසරේදී ස්ථාපිත කරන ලද සහ වර්තමානයේ අග්රාමාත්ය කාර්යාලය හා UNDP එකතුව ක්රියාත්මක කරන ‘සිත්රා’ සමාජ නවෝත්පාදන පර්යේෂණාගාරය (Citra Social Innovation Lab) හරහා ශ්රී ලංකාව ලබා ඇති අත්දැකීම් සහ නවෝත්පාදන යාන්ත්රණ පිළිබඳව ද භූතාන පාර්ශ්වය සමඟ අදහස් හුවමාරු කර ගත්තාය. මෙම අවස්ථාව සඳහා භූතාන කැබිනට් ලේකම්වරයා, අග්රාමාත්ය කාර්යාලයේ අධ්යක්ෂ ජනරාල්වරුන් සහ UNDP නියෝජිතයෝ පිරිසක් එක්ව සිටියහ.
