කටාර්හි දෝහා නගරයේ පැවැත්වෙන 2026 ලෝක විශ්වවිද්යාල බර ඉසිලීමේ ශූරතාවලියේ පිරිමි කිලෝග්රෑම් 60 බර පන්තිය නියෝජනය කළ ශ්රී ජයවර්ධනපුර විශ්වවිද්යාලයේ අවිඳු ලියනගෙදර, ලෝක විශ්වවිද්යාල ක්රීඩා ඉතිහාසයේ රන් පදක්කමක් දිනාගත් ප්රථම ශ්රී ලාංකික විශ්වවිද්යාල ක්රීඩකයා ලෙස අභිමානවත් ලෙස ඉතිහාසයට එක්විය. ස්නැච් ක්රමයට කිලෝග්රෑම් 105 ක් සහ ක්ලීන් ඇන්ඩ් ජර්ක් ක්රමයට කිලෝග්රෑම් 132 ක් ලෙස සමස්ත බර කිලෝග්රෑම් 237 ක් වාර්තා කරමින් ඔහු මෙම විශිෂ්ට ජයග්රහණය අත්කර ගත් අතර, ස්පාඤ්ඤයේ සහ චීන තායිපේ ප්රබල ක්රීඩකයෝ අභිබවා යමින් මෙරට ක්රීඩා ඉතිහාසයේ ස්වර්ණමය සන්ධිස්ථානයක් සනිටුහන් කිරීමට සමත් වූහ.
මෙම ඓතිහාසික ජයග්රහණය තවදුරටත් ඔප්නංවමින්, එම ශූරතාවලියේ ආරම්භක දිනයේදී සබරගමුව විශ්වවිද්යාලයේ නිපුන් දිසානායක කිලෝග්රෑම් 65 කාණ්ඩයෙන් ලෝකඩ පදක්කමක් දිනා ගැනීමට සමත් වීම මෙරට විශ්වවිද්යාල ක්රීඩාවේ ජාත්යන්තර ජයග්රහණ මාවතේ ප්රබල හැරවුම් ලක්ෂයක් බවට පත්ව ඇත. ජාත්යන්තර ක්රීඩා පිටියේදී සීමිත පහසුකම් මැද ශ්රී ලංකා විශ්වවිද්යාල ක්රීඩා සංගමයේ මෙහෙයවීම යටතේ සහභාගී වූ මෙම ක්රීඩකයන්ගේ දස්කම් හරහා මෙරට තරුණ ක්රීඩකයන්ගේ සැඟවුණු ප්රතිභාව මෙන්ම ගෝලීය මට්ටමේ තරගකාරීත්වය හමුවේ දස්කම් දැක්වීමේ හැකියාව මැනවින් තහවුරු වී තිබේ.
ලියනගෙදරගේ මෙම රන් පදක්කම සහ දිසානායකගේ ලෝකඩ පදක්කම ඉදිරි පරම්පරාවේ විශ්වවිද්යාල ක්රීඩක ක්රීඩිකාවන්ට ජාත්යන්තර මට්ටමට පිවිසීම සඳහා දැඩි ආස්වාදයක් සහ ආදර්ශයක් වනු ඇතැයි අපේක්ෂා කෙරේ. සැප්තැම්බර් 12 වැනි දින දක්වා ක්රියාත්මක වන මෙම ලෝක ශූරතාවලිය තුළ ශ්රී ලංකා නියෝජනය තවදුරටත් ශක්තිමත් කරමින් මෙරට ක්රීඩා ක්ෂේත්රයට අභිමානයක් ගෙන ඒමට මෙම ඓතිහාසික ජයග්රහණය සුවිශේෂී මාවතක් සකස් කර දී තිබේ.
