ශ්රී ලංකාව සතුව පවතින වසර 95ක සර්වජන ඡන්ද බල උරුමය සුරකිමින්, තාක්ෂණයෙන් පෝෂණය වූ සහ නීතියේ ආධිපත්යය සුරකින නව මාවතකට රට පිවිස ඇති බව අග්රාමාත්ය ආචාර්ය හරිනි අමරසූරිය මහත්මිය පැවසුවාය.
ජාත්යන්තර ප්රජාතන්ත්රවාදී දිනයට සමගාමීව මැතිවරණ කොමිෂන් සභාව සංවිධානය කළ විශේෂ සැමරුම් උත්සවයකට සහභාගී වෙමින් අග්රාමාත්යවරිය මේ බව සඳහන් කළාය.
මෙම උත්සවය සැප්තැම්බර් 15 වනදා රාජගිරිය මහ බැංකු අධ්යයන කේන්ද්රයේදී පැවැති අතර, මැතිවරණ ඉලෙක්ට්රොනික සේවාවට වසර 10ක් සපිරීම නිමිත්තෙන් සමරු මුද්දරයක් සහ මුල් දින කවරයක්ද එළිදැක්විණි.
ප්රජාතන්ත්රවාදයේ හදවත නීතියේ ආධිපත්යය බව පෙන්වා දුන් අග්රාමාත්යවරිය, නීතිය හමුවේ සියලුදෙනා සමාන විය යුතු බව අවධාරණය කළාය.
දේශපාලන බලපෑම්වලින් තොරව නීතිය ක්රියාත්මක කිරීම සඳහා පොලීසිය, අපරාධ පරීක්ෂණ දෙපාර්තමේන්තුව සහ අධිකරණ පද්ධතියට අවශ්ය නිදහස ලබාදී ඇති බවද ඇය සඳහන් කළාය.
එමෙන්ම දූෂණ විරෝධී පනත ක්රියාත්මක කරමින් මහජන මුදල් අවභාවිත කිරීම, රාජ්ය දේපළ අයථා ලෙස භාවිත කිරීම සහ අල්ලස් ගැනීම සම්බන්ධයෙන් පක්ෂ පාට භේදයකින් තොරව විමර්ශන සිදුකර නීතිමය ක්රියාමාර්ග ගැනීමට කටයුතු කරන බවද අග්රාමාත්යවරිය පැවසුවාය.
විදේශගත ශ්රී ලාංකිකයන්ට ඡන්ද අයිතිය ලබාදීමේ ක්රමවේදය සක්රීය කිරීම සඳහාද පියවර ගෙන ඇති බව ඇය සඳහන් කළාය. එය ශ්රී ලංකාවේ ප්රජාතන්ත්රවාදය තවදුරටත් ශක්තිමත් කරන පියවරක් බවද ඇය පෙන්වා දුන්නාය.
රාජ්ය ප්රසම්පාදන ක්රියාවලිය, කොන්ත්රාත් ලබාදීම සහ රාජ්ය මිලදී ගැනීම් ඩිජිටල්කරණය කිරීම හරහා විනිවිදභාවය වැඩි කිරීමටත්, වංචා හා දූෂණ සඳහා ඇති අවස්ථා අවම කිරීමටත් කටයුතු කරමින් සිටින බවද අග්රාමාත්යවරිය සඳහන් කළාය.
අධ්යාපනය, සෞඛ්යය සහ සමාජ සුබසාධනය ඇතුළු ක්ෂේත්රවල ප්රතිසංස්කරණ සිදුකරමින් සෑම පුරවැසියෙකුටම මූලික මානව හිමිකම් සහ සමාන අවස්ථා තහවුරු කිරීම රජයේ ප්රතිපත්තියක් බවද ඇය පැවසුවාය.
ප්රජාතන්ත්රවාදය යනු නීතිමය වගන්තිවලට පමණක් සීමා වූ දෙයක් නොව, පාලකයා සහ පාලිතයා අතර පවතින සැබෑ විශ්වාසය බවද අග්රාමාත්යවරිය වැඩිදුරටත් සඳහන් කළාය.
ජාති, ආගම් හෝ කුල භේදයකින් තොරව සියලු පුරවැසියන්ගේ අයිතිවාසිකම් සුරකින, ප්රජාතන්ත්රවාදී, නීතිගරුක සහ සාධාරණ ශ්රී ලංකාවක් අනාගත පරපුර වෙනුවෙන් දායාද කිරීම සියලුදෙනාගේ අරමුණ විය යුතු බවද ඇය අවධාරණය කළාය.
මෙම අවස්ථාවට මැතිවරණ කොමිෂන් සභාවේ සභාපති ආර්. එම්. ඒ. එල්. රත්නායක, මැතිවරණ කොමසාරිස් ජනරාල් රසික පීරිස් ඇතුළු මැති ඇමතිවරුන්, දේශපාලන පක්ෂ නියෝජිතයින් සහ රාජ්ය නිලධාරීන් රැසක් සහභාගී වූහ.
