කොළඹ ආරක්ෂක සමුළුවේ රාමුව යටතේ ඉන්දියාවේදී ආරම්භ වී ඇති විශේෂිත ත්‍රස්ත විරෝධී සහ ප්‍රාණ ඇපකරුවන් මුදාගැනීමේ පුහුණු පාඨමාලාවක් සඳහා ශ්‍රී ලංකා ත්‍රිවිධ හමුදා නිලධාරීන් තිදෙනෙකු සහභාගී වී සිටිති. සැප්තැම්බර් 21 වන දින ආරම්භ වූ මෙම පාඨමාලාව හරහා නිලධාරීන්ට ත්‍රස්ත විරෝධී සහ ප්‍රාණ ඇපකරුවන් මුදාගැනීමේ මෙහෙයුම්වලදී අනුගමනය කරන ස්ථාපිත ක්‍රියාමාර්ග, මෙහෙයුම් සංකල්ප සහ හොඳම භාවිතයන් පිළිබඳ පුළුල් අවබෝධයක් ලබාදීම අපේක්ෂා කෙරේ.
කොළඹ ආරක්ෂක සමුළුවේ සාමාජික රටවල ආරක්ෂක අංශ අතර වෘත්තීය අත්දැකීම් හුවමාරු කර ගැනීමට සහ ආයතනික සබඳතා ශක්තිමත් කර ගැනීමට මෙම පාඨමාලාව කදිම වේදිකාවක් වී තිබේ. ඉන්දියාව, ශ්‍රී ලංකාව, මාලදිවයින සහ මොරීසියස් සාමාජික රටවල් ලෙසත්, බංග්ලාදේශය සහ සීෂෙල්ස් නිරීක්ෂකයන් ලෙසත් කටයුතු කරන මෙම කලාපීය සංවිධානය ඉන්දීය සාගර කලාපයේ ඒකාබද්ධ ආරක්ෂාව සහ ස්ථාවරත්වය තවදුරටත් තහවුරු කිරීම සඳහා මෙවැනි පුහුණු වැඩසටහන් නිරන්තරයෙන් ක්‍රියාවට නංවයි.
