ජාතික නිදහස් පෙරමුණේ නායක, හිටපු පාර්ලිමේන්තු මන්ත්‍රී විමල් වීරවංශ මහතා වත්මන් ආණ්ඩුවේ ආර්ථික හා දේශපාලන ප්‍රතිපත්ති මෙන්ම රටේ භූ දේශපාලනික තත්ත්වය සම්බන්ධයෙන් දැඩි විවේචන එල්ල කර තිබෙනවා.
ශ්‍රී ලංකා පදනම් ආයතනයේදී ඉකුත් 27 වැනිදා පැවති විශේෂ දේශනයකදී ඔහු ප්‍රකාශ කර ඇත්තේ ජනාධිපති අනුර කුමාර දිසානායක මහතාගේ පාලනය වෙනිසියුලාවේ ඩෙල්සි රොඩ්‍රිගස්ගේ පාලනයට සමාන වන බවයි.
වෙනිසියුලාවේ ඩෙල්සි රොඩ්‍රිගස් එරට සම්පත් ඇමෙරිකානු බහුජාතික සමාගම් වෙත ලබාදෙන බවට ඔහු චෝදනා කළ අතර, වත්මන් ශ්‍රී ලංකා ආණ්ඩුවද වාමාංශික හා සමාජවාදී ස්වරූපයක් පෙන්වමින් නව-ලිබරල් ආර්ථික වැඩපිළිවෙළක් ක්‍රියාත්මක කරන බවට විවේචනය කර තිබෙනවා.
එමෙන්ම රටේ දේශීය ණය, දුප්පත්කම, තරුණ රැකියා විරහිතභාවය, කෘෂිකර්මාන්තය සහ විදුලි ක්ෂේත්‍රය සම්බන්ධයෙන්ද විමල් වීරවංශ මහතා ආණ්ඩුවට චෝදනා එල්ල කර තිබෙනවා. සූර්ය බලශක්ති ක්ෂේත්‍රය සහ ගල්අඟුරු ආනයනය සම්බන්ධයෙන්ද ඔහු කරුණු ඉදිරිපත් කරමින් විවේචන සිදු කළ බව සඳහන්.
මේ අතර උතුරු හා නැගෙනහිර ප්‍රදේශවල සිංහල බෞද්ධ උරුමයන්ට සහ රණවිරුවන්ට එල්ල වන බවට ඔහු පවසන තර්ජන සම්බන්ධයෙන්ද දේශනයේදී අවධානය යොමු කර තිබෙනවා.
උතුරේ එල්.ටී.ටී.ඊ. සැමරුම්, පුරාවිද්‍යාත්මක ස්ථාන, ඉඩම් සහ පොලිස් බලතල සම්බන්ධයෙන් ආණ්ඩුව සහ එල්.ටී.ටී.ඊ. ඩයස්පෝරාව අතර “අශුද්ධ එකඟතාවක්” පවතින බවටද විමල් වීරවංශ මහතා චෝදනා කර ඇති අතර, ඒ හරහා රටේ භෞමික අඛණ්ඩතාවට අනාගතයේදී බලපෑම් ඇතිවිය හැකි බවට අනතුරු අඟවා තිබෙනවා.
