නියමිත බරට වඩා අඩු පාන් අලෙවි කිරීම සහ පාන්වල බර හා මිල නිසි ලෙස ප්‍රදර්ශනය නොකිරීම සම්බන්ධයෙන් පාරිභෝගික කටයුතු පිළිබඳ අධිකාරිය දිවයින පුරා විශේෂ වැටලීම් ක්‍රියාත්මක කර තිබේ. සැප්තැම්බර් 29 වැනිදා සිදුකළ නවතම මෙහෙයුමේදී වෙළෙඳසැල් සහ බේකරි 107ක් පරීක්ෂා කර ඇති අතර, බර අඩු පාන් සම්බන්ධ සිද්ධි 35ක් හඳුනාගෙන ඇත.
එම මෙහෙයුමේදී ස්ථාන 85ක පාන්වල බර නිසි ලෙස ප්‍රදර්ශනය කර නොතිබූ අතර, ස්ථාන 55ක මිල ප්‍රදර්ශනය කර නොතිබූ බව පාරිභෝගික කටයුතු පිළිබඳ අධිකාරිය සඳහන් කරයි. බර අඩු පාන් හමුවන අවස්ථාවලදී සිල්ලර වෙළෙඳුන්ට පමණක් නොව, එම පාන් නිෂ්පාදනය කළ හෝ සැපයූ බේකරි දක්වා විමර්ශන සිදුකරන ලෙස නිලධාරීන්ට උපදෙස් ලබාදී තිබේ.
සැප්තැම්බර් 1 සිට 3 දක්වා පැවති මීට පෙර මෙහෙයුමකදී තවත් බර අඩු පාන් සම්බන්ධ සිද්ධි 54ක් හඳුනාගෙන තිබූ බැවින්, මෙහෙයුම් දෙක තුළ හඳුනාගෙන ඇති සමස්ත සිද්ධි සංඛ්‍යාව 89කි. 2024 වසරේ සිට ක්‍රියාත්මක CAA නියෝගයකට අනුව පාන්වල නියමිත බර සහ අදාළ තොරතුරු පැහැදිලිව ප්‍රදර්ශනය කළ යුතු අතර, ඉදිරියටත් වැටලීම් අඛණ්ඩව සිදුකරන බව අධිකාරිය පවසයි.
