ලෝක ජනාවාස දිනය නිමිත්තෙන් දිවයින පුරා අඩු ආදායම්ලාභී පවුල් වෙනුවෙන් ඉදිකෙරුණු නිවාස 5,000ක් විවෘත කිරීමේ ජාතික වැඩසටහනට සමගාමීව, “තමන්ගේම තැනක් – ලස්සන ජීවිතයක්” නිවාස ව්‍යාපෘතිය යටතේ මහියංගනය සහ රිදිමාලියද්ද ප්‍රාදේශීය ලේකම් බලප්‍රදේශවල ඉදිකළ නව නිවාස ප්‍රතිලාභීන් වෙත නිල වශයෙන් භාරදීම සිදු කර තිබේ.
බදුල්ල දිස්ත්‍රික් පාර්ලිමේන්තු මන්ත්‍රී සුදත් බලගල්ල මහතාගේ ප්‍රධානත්වයෙන් සහ මහියංගන ප්‍රාදේශීය සභාවේ සභාපතිනී උපේක්ෂා විජේතුංග මහත්මියගේ සහභාගීත්වයෙන් අද (ඔක්තෝබර් 05) මහියංගන බලප්‍රදේශයේ දඹාන, බෙලිගල්ල, තලංගමුව, අලුත්තරම, අලුයටවෙල සහ දෙහිගොල්ල යන ග්‍රාම නිලධාරී වසම් 06 හි නිවාස ප්‍රතිලාභී පවුල් වෙත මෙම නිවාස ලබා දී ඇත. කුඩා දරුවන් හෝ ආබාධිත සාමාජිකයින් සිටින, පැල්පත් හා තාවකාලික නිවාසවල ජීවත් වූ අඩු ආදායම්ලාභී පවුල්වල ජීවන තත්ත්වය උසස් කරමින් සාලය, නිදන කාමර දෙකක්, මුළුතැන්ගෙය සහ නාන කාමරයකින් සමන්විත වර්ග අඩි 550 කින් යුත් මෙම නිවසක් සඳහා රජය මගින් රුපියල් ලක්ෂ 10 ක මූල්‍යාධාරයක් සහ තාක්ෂණික සහය ලබා දී ඇති අතර, ඉතිරි වටිනාකම ප්‍රතිලාභියාගේ සහ ප්‍රජාවගේ ශ්‍රම දායකත්වයෙන් සම්පූර්ණ කර ඇත.
