නුවරඑළිය මහ නගර සභා බල ප්‍රදේශයට පිරිසිදු පානීය ජලය ලබාදීම සහ ජල අපවාහන පද්ධතිය සකස් කිරීම සඳහා රජය රුපියල් බිලියන 25.1ක ප්‍රතිපාදන වෙන්කර ඇති බව නුවරඑළිය මහ නගර සභාවේ නගරාධිපති උපාලි වනිගසේකර මහතා පවසයි.
නගරාධිපතිවරයා සඳහන් කළේ, නුවරඑළිය නගර සභාව මගින් මේ වනවිට ප්‍රදේශවාසීන්ට සහ සංචාරක හෝටල් සඳහා ලබාදෙන ජලය පිරිසිදු පානීය ජලය නොවන බවයි.
එළඹෙන වසන්ත සමයේදී නුවරඑළිය මහ නගර සභා සීමාවේ ජල පාරිභෝගිකයින් 9,000කට පමණ පිරිසිදු පානීය ජලය ලබාදීමේ ගැටලුවක් පවතින බවද නගරාධිපතිවරයා සඳහන් කර තිබේ.
නුවරඑළියට පිරිසිදු පානීය ජලය ලබාදීමේ සහ ජල අපවාහන පද්ධතිය සකස් කිරීමේ ව්‍යාපෘතිය ජල සම්පාදන හා ජලාපවහන මණ්ඩලයට පැවරීමෙන් පසු මෙම ගැටලුවට විසඳුම් ලැබෙනු ඇති බවද ඔහු පවසයි.
මෙම ව්‍යාපෘතිය ක්‍රියාත්මක කිරීමෙන් නගර සභාවේ සේවකයින්ගේ රැකියා සම්බන්ධයෙන් ගැටලුවක් ඇති නොවන බවත්, පිරිසිදු පානීය ජලය ලබාදීමේදී ජල ගාස්තු වැඩිවීමක් සිදු නොවන බවත් නගරාධිපතිවරයා වැඩිදුරටත් සඳහන් කර ඇත.
මේ අතර, නුවරඑළිය දිස්ත්‍රික් සංවර්ධන කමිටුවේ සභාපති සහ පාර්ලිමේන්තු මන්ත්‍රී මංජුල සුරවීරආරච්චි මහතා සඳහන් කළේ මෙම ව්‍යාපෘතිය සඳහා මහා සංඝරත්නය, විපක්ෂ මන්ත්‍රීවරුන් සහ ප්‍රදේශවාසීන්ගේ ප්‍රසාදය හා එකඟතාව පළවී ඇති බවයි.
ග්‍රෙගරි වැවේ ජලය දැනට අපිරිසිදු තත්ත්වයක පවතින බව මධ්‍යම පරිසර අධිකාරිය පෙන්වාදී ඇති අතර, නව ව්‍යාපෘතිය ක්‍රියාත්මක කිරීමෙන් ග්‍රෙගරි වැවේ ජලය සහ පරිසරය ආරක්ෂා කර පිරිසිදු තත්ත්වයේ පවත්වාගෙන යාමට හැකිවනු ඇති බවද මන්ත්‍රීවරයා සඳහන් කර තිබේ.
