ජාත්‍යන්තර මූල්‍ය අරමුදල (IMF) විසින් ලෝක වෙළෙඳපොළේ ඉහළ යන ඉන්ධන මිල ගණන්වලට සාපේක්ෂව මෙරට ඉන්ධන මිල ගැලපීම සම්බන්ධයෙන් ලබාදී ඇති උපදෙස් පිළිබඳව කැබිනට් ප්‍රකාශක අමාත්‍ය වෛද්‍ය නලින්ද ජයතිස්ස මහතා අද (06) අදහස් පළ කළා.
කැබිනට් තීරණ දැනුම්දීමේ මාධ්‍ය හමුවේදී අමාත්‍යවරයා සඳහන් කළේ IMF විසින් විදුලිය, ජලය සහ ඉන්ධන වැනි සේවාවල පිරිවැය ගැලපීමට උපදෙස් ලබාදී තිබුණද, රජය සමස්ත පිරිවැය ජනතාව මත පැටවීමකින් තොරව සහන ලබාදී ඇති බවයි.
ඔහු සඳහන් කළේ පසුගිය අවස්ථාවේ ඩීසල් ලීටරයකට රුපියල් 100ක සහනයක් ලබාදී ඇති අතර, මේ වනවිට ඩීසල් ලීටරයකට රුපියල් 70ක සහනයක් ලබාදෙන බවයි.
එමෙන්ම, පසුගිය අවස්ථාවේ පෙට්‍රල් ලීටරයකට රුපියල් 20ක සහනයක් ලබාදී ඇති බවද අමාත්‍යවරයා සඳහන් කළා.
ලෝක වෙළෙඳපොළේ ඉන්ධන මිල ගණන් උච්චාවචනය වන ආකාරය අනුව ඉදිරියේදී කටයුතු කරන බවත්, IMF උපදෙස් පවතින අවස්ථාවකදී වුවද ජනතාවට සහන ලබාදීමට රජයට හැකි වී ඇති බවත් අමාත්‍යවරයා වැඩිදුරටත් පැවසුවා.
