නීතිවිරෝධි ධීවර කටයුතු හේතුවෙන් සමුද්‍රීය පරිසරයට, සංචාරක කර්මාන්තයට සහ අනාගත පරපුරට සිදුවන අහිතකර බලපෑම් පිළිබඳව නැඟෙනහිර පළාතේ ධීවර ප්‍රජාව දැනුම්වත් කිරීමේ විශේෂ වැඩසටහනක් පවත්වා තිබේ. නාවික හමුදා නියෝජ්‍ය මාණ්ඩලික ප්‍රධානී හා නැඟෙනහිර නාවික විධානයේ ආඥාපති රියර් අද්මිරාල් බුද්ධික ලියනගමගේ මහතාගේ ප්‍රධානත්වයෙන් මෙම වැඩසටහන ත්‍රිකුණාමලය නාවික තටාකාංගණයේදී සංවිධානය කර ඇත.
ධීවර හා ජලජ සම්පත් දෙපාර්තමේන්තු නිලධාරීන් සහ නැඟෙනහිර පළාත් ධීවර සංගම් නියෝජිතයන්ගේ සහභාගීත්වයෙන් පැවති මෙම හමුවේදී, නැඟෙනහිර මුහුදේ නීතිවිරෝධි ධීවර කටයුතු මැඬපැවැත්වීම සහ මසුන් ඇල්ලීමේ සම්මත පන්න ක්‍රම භාවිතය ප්‍රවර්ධනය කිරීම පිළිබඳව පුළුල් ලෙස සාකච්ඡා කෙරිණි. නීතිවිරෝධි ඩයිනමයිට් භාවිතය සහ තහනම් ක්‍රම මඟින් මසුන් ඇල්ලීම හේතුවෙන් මසුන් බෝවීම අඩුවී මුහුදු සම්පත් විනාශ වීම මෙන්ම, අනාගතයේදී ඇති විය හැකි අයහපත් ප්‍රතිවිපාක සම්බන්ධයෙන්ද ධීවර ප්‍රජාව දැනුම්වත් කරන ලදී.
මෙම අවස්ථාවට නැඟෙනහිර නාවික විධානයේ ජ්‍යෙෂ්ඨ නිලධාරීන්, ත්‍රිකුණාමලය හා මුලතිව් දිස්ත්‍රික්කයන්හි ධීවර අධ්‍යක්ෂවරුන් සහ ධීවර සමიති නියෝජිතයෝ පිරිසක් එක්ව සිටියහ. නීත්‍යානුකූලව ධීවර කර්මාන්තයේ යෙදෙන ධීවරයන්ගේ ගැටලු විසඳීම සඳහා රාජ්‍ය ආයතන, නාවික හමුදාව සහ ධීවර ප්‍රජාව අතර සම්බන්ධීකරණය සහ සහයෝගීතාව තවදුරටත් ශක්තිමත් කිරීම මෙමඟින් අපේක්ෂා කෙරේ.
