කොළඹ වරායේ මෙහෙයුම් කාර්යක්ෂමතාව ඉහළ නැංවීම සහ ඩිජිටල්කරණය සඳහා අමෙරිකා එක්සත් ජනපදය ඩොලර් මිලියන 17ක මූල්‍ය ප්‍රදානයක් ලබාදී තිබේ.
ඒ අනුව, අමෙරිකානු තානාපති එරික් එස්. මේයර් මහතා අද (16) පෙරවරුවේ කොළඹ වරාය පරිශ්‍රයේ නිරීක්ෂණ චාරිකාවක නිරත වී තිබේ.
මෙම ප්‍රදානය **නාවික තනි කවුළුව (Maritime Single Window)** සහ වරාය මෙහෙයුම් ඩිජිටල්කරණය සඳහා යොදා ගැනීමට නියමිත බව වරාය හා සිවිල් ගුවන්සේවා අමාත්‍ය අනුර කරුණාතිලක මහතා සඳහන් කළේය.
අමෙරිකානු තාක්ෂණය හඳුන්වාදීමෙන් භාණ්ඩ මෙහෙයුම් වේගවත් කිරීමටත්, වෙළෙඳ කටයුතු වඩාත් කාර්යක්ෂම කිරීමටත් හැකිවනු ඇති බව තානාපතිවරයා පවසා තිබේ.
වරාය අධිකාරියේ සභාපති ආචාර්ය පරාක්‍රම දිසානායක මහතා සඳහන් කළේ, මේ වසරේදී බහාලුම් මිලියන 9ක් මෙහෙයවීමට අපේක්ෂා කරන බවයි. එයින් සියයට 80ක් පමණ ප්‍රතිනැව්ගත කිරීම් බවද ඔහු පැවසීය.
මෙම ව්‍යාපෘතිය මඟින් කොළඹ වරායේ මෙහෙයුම් කටයුතු වඩාත් කාර්යක්ෂම කරමින් ජාත්‍යන්තර වෙළෙඳාමට සහාය වීම අපේක්ෂා කෙරේ.
