ඇමෙරිකා එක්සත් ජනපදයේ ගුවන් ගමන් පාලකයන් දහස් ගණනකට 2.8%ක වැටුප් වැඩිවීමක් ලබාදීමට එරට ෆෙඩරල් ගුවන් සේවා පරිපාලනය (FAA) සහ වෘත්තීය සමිතියක් අතර එකඟතාවක් ඇතිවී තිබේ.
Reuters වාර්තාවට අනුව, කොංග්‍රසය විසින් අනුමත කර ඇති මෙම වැටුප් වැඩිවීම 2026 ජනවාරි 1 වැනිදා සිට බලපැවැත්වෙන පරිදි ගණනය කෙරෙන අතර, ඔක්තෝබර් 18 වැනිදා සිට ක්‍රියාත්මක කිරීමට නියමිතය.
මීට පෙර 1%ක වැටුප් වැඩිවීමක් ලබාදී තිබූ අතර, ඉතිරි වැටුප් වැඩිවීම ලබාදීම සේවා කාර්ය මණ්ඩල ප්‍රතිසංස්කරණ සමඟ සම්බන්ධ කර තිබූ බව වාර්තාව සඳහන් කරයි. මෙම වැටුප් වැඩිවීම සඳහා වෙන්කර ඇති මුදල ඩොලර් මිලියන 140කි.
එකඟතාවට අනුව, සේවකයන්ගේ වැඩ කරන කාලය වඩාත් නිවැරදිව නිරීක්ෂණය කිරීම, ගුවන් ගමන් ඉල්ලුමට ගැළපෙන පරිදි කාර්ය මණ්ඩලය යෙදවීම සහ පාලකයන්ගේ සේවා ස්ථාන මාරු ක්‍රමවේද වැඩිදියුණු කිරීම ඇතුළු වෙනස්කම් සිදුකිරීමට නියමිතය.
ඇමෙරිකාව තුළ ගුවන් ගමන් පාලකයන්ගේ හිඟයක් පවතින අතර, බොහෝ නිලධාරීන්ට අනිවාර්ය අතිකාල සේවයේ සහ සතියකට දින හයක් සේවය කිරීමේ අවශ්‍යතාව මතුව ඇති බව Reuters වාර්තාවේ දැක්වේ.
නව එකඟතාව යටතේ, අපේක්ෂිත ගුවන් ගමන් ප්‍රමාණය සහ මෙහෙයුම් අවශ්‍යතා සැලකිල්ලට ගනිමින් සේවා මුර සැලසුම් සකස් කිරීමට ප්‍රාදේශීය කළමනාකරුවන් සහ වෘත්තීය සමිති නියෝජිතයන් කටයුතු කරනු ඇත.
