වාර්ෂිකව දැකගත හැකි ‘Orionids’ උල්කාපාත වර්ෂාව ඔක්තෝබර් 21 සහ 22 යන දිනවල උපරිමයට ළඟා වන අතර, ශ්‍රී ලංකාවේ සිටින අයට ද රාත්‍රී අහසේ මෙම සංසිද්ධිය නිරීක්ෂණය කිරීමට අවස්ථාව පවතී.
මොරටුව ආතර් සී. ක්ලාක් මධ්‍යස්ථානය සඳහන් කරන පරිදි, මෙම උල්කාපාත වර්ෂාව නිරීක්ෂණය කිරීම සඳහා පැහැදිලි අහසක් සහිත ස්ථානයක් තෝරාගැනීම වැදගත් වේ. නාසා ආයතනයේ තොරතුරු අනුව ද Orionids උල්කාපාත වර්ෂාව ඔක්තෝබර් 21–22 රාත්‍රියේ උපරිමයට පැමිණීමට නියමිතය.
මෙම උල්කාපාත වර්ෂාව ඇතිවන්නේ පෘථිවිය සුප්‍රකට හැලීගේ ධූමකේතුව (Halley’s Comet) විසින් අභ්‍යවකාශයේ ඉතිරි කර ඇති දූවිලි හා කුඩා අංශු මාර්ගය හරහා ගමන් කිරීමේදීය. එම අංශු පෘථිවි වායුගෝලයට තත්පරයට කිලෝමීටර් 66ක පමණ වේගයකින් ඇතුළු වී දැවී යාමෙන් අහසේ ආලෝක රේඛා ලෙස දිස්වේ.
සුදුසු අඳුරු අහසක් යටතේ පැයකට උල්කාපාත 10ත් 20ත් අතර ප්‍රමාණයක් දැකගැනීමට හැකි වුවද, මෙම වසරේ දීප්තිමත් සඳ එළිය නිසා දුර්වල ආලෝකයක් ඇති උල්කාපාත නිරීක්ෂණය කිරීම අපහසු විය හැකිය. සඳ බැස යාමෙන් පසු අලුයමට පෙර කාලය නිරීක්ෂණයට වඩාත් සුදුසු විය හැකි බව නාසා ආයතනය පෙන්වා දෙයි.
මෙම සංසිද්ධිය නිරීක්ෂණය කිරීමට දුරේක්ෂයක් අවශ්‍ය නොවන අතර පියවි ඇසින්ම අහස නිරීක්ෂණය කළ හැකිය. හැකි නම් නගර ආලෝකයෙන් ඈත් වූ, අහස පුළුල්ව පෙනෙන ආරක්ෂිත ස්ථානයක් තෝරාගෙන, ඇස් අඳුරට හුරු වීමට සුළු වේලාවක් ලබාදීම සුදුසුය.
