ශ්‍රී ලංකන් ගුවන් සේවයේ සමස්ත පරිගණක හා ඩිජිටල් මෙහෙයුම් පද්ධතිය ජාත්‍යන්තර හැකර්වරුන් කණ්ඩායමකගේ පාලනයට නතුව ඇති බවත්, එමඟින් ජාතික ගුවන් සේවය ඕනෑම මොහොතක දැවැන්ත අනතුරකට ලක්කිරීමේ බරපතළ අවදානමක් මතු වී ඇති බවත් පාර්ලිමේන්තු මන්ත්‍රී දයාසිරි ජයසේකර මහතා පාර්ලිමේන්තුවේදී හෙළිදරව් කර තිබේ. පසුගිය ජූනි මස අගදී ‘බ්ලැක්නෙට්’ නමැති සංවිධානාත්මක හැකර් කල්ලියක් විසින් ගුවන් සේවයේ මුළු පද්ධතියම අත්පත් කරගනිමින් ඩාක් වෙබ් (Dark Web) හරහා වීඩියෝ පටයක්ද මුදාහැර ඇති අතර, පද්ධතිය යළි නිදහස් කිරීම සඳහා බිට්කොයින් ක්‍රිප්ටෝ මුදල් මාධ්‍යයෙන් ඇමෙරිකානු ඩොලර් 50,000ක කප්පම් මුදලක් ඉල්ලා ඇත. ජාතික ආරක්ෂාවට සහ ගුවන් ගමන් මෙහෙයුම්වල සුරක්ෂිතතාවට සෘජුවම බලපාන මෙම තත්ත්වය හමුවේ ගුවන් සේවයේ අභ්‍යන්තර විද්‍යුත් තැපැල් පද්ධති සහ ආරක්ෂණ විධිවිධාන සම්පූර්ණයෙන්ම බිඳ වැටී තිබීම රටක් ලෙස මුහුණ දී ඇති බරපතළ සයිබර් අර්බුඩයක් බව මෙහිදී තහවුරු විය.
මෙම අතිශය සංවේදී සහ අවදානම් සහගත තත්ත්වය යටතේ වුවද, අදාළ සයිබර් අනතුර පිළිබඳව නිසි පරිදි පරීක්ෂණයක් ආරම්භ කිරීමට උත්සාහ කළ නිලධාරියෙකුට එරෙහිව ජනාධිපති ලේකම් කාර්යාලය හරහා පරීක්ෂණයක් දියත් කර සිද්ධිය යටපත් කිරීමට උත්සාහ දරන බවට පාර්ලිමේන්තුවේදී දැඩි චෝදනා එල්ල විය. සිංගප්පූරුවේ ස්ථානගතව සිටින ඇමෙරිකානු ආරක්ෂක උපදේශක අංශ විසින් රාජ්‍ය තාන්ත්‍රික මට්ටමින් මෙම සයිබර් පද්ධතිය යථා තත්ත්වයට පත් කර දීමට සහාය වීමට ඉදිරිපත් වුවද, බලධාරීන් අද වන තුරුත් එම විදේශීය සහාය ලබා ගැනීමට කටයුතු නොකිරීම අතිශයින් සැකකටයුතු මෙන්ම ජාතික ආරක්ෂාව සම්බන්ධයෙන් දැඩි ප්‍රශ්න මතු කරන්නකි.
ජාතික ගුවන් සේවයක මෙහෙයුම් පද්ධතියක් මෙවැනි බාහිර පාර්ශ්වයක පාලනයට නතු වීම මඟින් ශ්‍රී ලංකාවේ ජාත්‍යන්තර කීර්තිනාමයට සහ ගුවන් සේවා විශ්වසනීයත්වයට පිරවිය නොහැකි හානියක් සිදුවිය හැකි බැවින්, වහාම රාජ්‍ය මට්ටමේ මැදිහත්වීමකින් යුතුව මෙම තත්ත්වය පාලනය කිරීමට පියවර ගත යුතුව ඇත. සයිබර් ආරක්ෂණ විධිවිධාන දැඩි කිරීමත්, අදාළ වගකිවයුතු පාර්ශ්වයන් විනිවිදභාවයකින් යුතුව වගකීමට යටත් කිරීමත් නොකළහොත්, මෙරට ප්‍රවාහන හා ආර්ථික ක්ෂේත්‍රයට අතිශය විනාශකාරී ප්‍රතිඵල අත්විය හැකි බව ආරක්ෂක සහ තාක්ෂණික ක්ෂේත්‍රයේ ප්‍රවීණයෝ පෙන්වා දෙති.
