පාස්කු ඉරුදින ත්‍රස්ත ප්‍රහාරය පිළිබඳ විමර්ශන නොමඟ යැවීමේ සිද්ධියට අදාළ නඩුව කොටුව මහේස්ත්‍රාත් පසන් අමරසේන මහතා ඉදිරියේ යළි කැඳවූ අවස්ථාවේදී, හිටපු ජනාධිපති ගෝඨාභය රාජපක්ෂ මහතාට එරෙහි විමර්ශන මේ වන විට ප්‍රබල තත්ත්වයක පවතින බව නීතිපති දෙපාර්තමේන්තුව වෙනුවෙන් පෙනී සිටි අතිරේක සොලිසිටර් ජනරාල් දිලීප පීරිස් මහතා අධිකරණයට දැනුම් දී තිබේ.
හිටපු ජනාධිපතිවරයා තවමත් මෙම නඩුවේ සැකකරුවෙකු ලෙස නිල වශයෙන් නම් කර නොමැති වුවද, ඔහු සම්බන්ධයෙන් සිදු කෙරෙන විමර්ශන ඉතා ශක්තිමත් මට්ටමක පවතින බව අතිරේක සොලිසිටර් ජනරාල්වරයා සඳහන් කළේය. සිංගප්පූරුවේ මවුන්ට් එළිසබෙත් රෝහලේදී සිදුකළ හෘද සැත්කමකින් පසු ප්‍රතිකාර සහ පසුපරික්ෂා කිරීම් සඳහා සති දෙකක කාලයක් විදෙස්ගත වීමට අවසර ඉල්ලා හිටපු ජනාධිපතිවරයා විසින් මෝසමක් ඉදිරිපත් කර ඇති බවත්, මානුෂික හේතූන් මත ඊට ඉඩ ලබා දිය හැකි බවත් ඔහු වැඩිදුරටත් පෙන්වා දුන්නේය.
මෙම නඩුවේ සැකකරුවෙකු ලෙස රඳවා සිටින රාජ්‍ය බුද්ධි සේවයේ හිටපු අධ්‍යක්ෂ විශ්‍රාමික මේජර් ජෙනරල් සුරේෂ් සලේ මහතාට අපරාධ පරීක්ෂණ දෙපාර්තමේන්තුව තුළ යහපත් සැලකිලි ලැබෙන බවත්, පාස්කු ප්‍රහාරයට පෙර සහ පසු සිදුවීම් සම්බන්ධයෙන් සුවිශේෂී තොරතුරු රැසක් අනාවරණය වී ඇති බවත් නීතිපති දෙපාර්තමේන්තුව අධිකරණයට කරුණු වාර්තා කළේය. ඉදිරිපත් වූ කරුණු සලකා බැලූ මහේස්ත්‍රාත්වරයා, නඩුවේ වැඩිදුර විමර්ශන ප්‍රගතිය වාර්තා කිරීම සඳහා ලබන නොවැම්බර් 25 වන දින දක්වා නඩුව යළි කැඳවීමට නියෝග කළේය.
