අමෙරිකා එක්සත් ජනපදයේ විශේෂ නියෝජිත ස්ටීව් විට්කොෆ් සහ රුසියානු ජනාධිපති ව්ලැදිමීර් පුටින් අතර සාන්ත පීටර්ස්බර්ග් නුවරදී පැවැති සාකච්ඡාවකින් අනතුරුව, යුක්‍රේනය සමඟ සාකච්ඡා ඉක්මනින් නැවත ආරම්භ කිරීමට රුසියානු ජනාධිපතිවරයා එකඟතාව පළ කර තිබේ. දෙවන ලෝක යුද්ධයෙන් පසු යුරෝපයේ ඇති වූ දරුණුතම යුද ගැටුම නැවැත්වීම සඳහා අමෙරිකාව දරන ප්‍රයත්නයේ තවත් පියවරක් ලෙස පැය තුනකට ආසන්න කාලයක් මෙම සාකච්ඡාව ක්‍රියාත්මක වී ඇත. රුසියාවේ රඳවාගෙන සිටි හිටපු අමෙරිකානු ගුරුවරයෙකු වන ස්ටීවන් හබාර්ඩ් නිදහස් කිරීමේ සුහදශීලී පියවරකින් මෙම සාකච්ඡා මාලාව ආරම්භ වී තිබීම විශේෂත්වයකි.
ඒ අනුව අබුඩාබි හිදී පැවැත්වීමට නියමිත පාර්ශ්ව ත්‍රිත්වයේ තාක්ෂණික මට්ටමේ සාකච්ඡා නොවැම්බර් 10 වන දින හෝ ඉන් පසුව ආරම්භ වීමට නියමිත අතර, එහිදී යුද්ධයෙන් පසු යුක්‍රේනයේ සහ රුසියාවේ ආරක්ෂාව තහවුරු කිරීම සම්බන්ධයෙන් ප්‍රධාන වශයෙන් අවධානය යොමු කෙරෙනු ඇත. කෙසේ වෙතත්, සාකච්ඡාවල සාර්ථකත්වය පිළිබඳව රුසියාව දැඩි අපේක්ෂා තබා නොමැති බව පවසන ක්‍රෙම්ලින් උපදේශක යූරි උෂකොව්, අමෙරිකාව සහ යුක්‍රේනය ඉදිරිපත් කර ඇති ඇතැම් යෝජනා තවමත් රුසියාවට සම්පූර්ණයෙන්ම සෑහීමකට පත්විය හැකි මට්ටමක නොමැති බව සඳහන් කර ඇත. රුසියාව සිය ප්‍රධාන යුද ඉලක්ක මඟහැරීමට තවමත් නම්‍යශීලීභාවයක් පෙන්වා නැති අතර, අමෙරිකාව සහ යුක්‍රේනය අතර ඇතැම් සබඳතාවල යම් අර්බුදකාරී තත්ත්වයක් ද මතුව ඇති පසුබිමක මෙම සාකච්ඡා කෙරෙහි ජාත්‍යන්තර අවධානය යොමුව තිබේ.
