2026 වසර සඳහා නියමිත වාර්ෂික ආදායම් ඉලක්කය අපේක්ෂිත කාලයටත් වඩා පෙර සාර්ථකව ඉක්මවා යමින් ශ්‍රී ලංකා රේගුව වාර්තාගත ආදායමක් එකතු කරගැනීම සම්බන්ධයෙන් මුදල් අමාත්‍යාංශ ලේකම් සහ භාණ්ඩාගාර ලේකම් ආචාර්ය හර්ෂණ සූරියප්පෙරුම මහතා රේගු නිලධාරීන් වෙත සිය විශේෂ ප්‍රශංසා පවත්වා තිබේ. රේගු දෙපාර්තමේන්තුවේ පැවති විශේෂ උත්සවයකදී හෙතෙම මෙම අදහස් පළ කළ අතර, 2026 වසර සඳහා රුපියල් බිලියන 2,207ක වාර්ෂික ආදායම් ඉලක්කය ඔක්තෝබර් 13 වන දින වන විටම රුපියල් බිලියන 2,208ක් ලෙස ඉක්මවා යාමට රේගුව සමත්ව තිබූ බව මුදල් අමාත්‍යාංශය පවසයි. එම ආදායම ඔක්තෝබර් 21 වන විට රුපියල් බිලියන 2,286ක් දක්වා තවදුරටත් වර්ධනය වී ඇති අතර, පසුගිය වසරට වඩා කෙටි කාලයක් තුළ මෙම ඉලක්ක සපුරා ගැනීමට හැකිවීම රටේ ආර්ථික ස්ථාවරත්වය තහවුරු කිරීමට මහත් රුකුලක් වූ බව ලේකම්වරයා පෙන්වා දුන්නේය.
රේගුව මගින් එකතු කරනු ලබන මෙම ආදායම යටිතල පහසුකම් සංවර්ධනය, අධ්‍යාපනය, සෞඛ්‍යය සහ ජනතා සුබසාධනය වැනි අත්‍යවශ්‍ය ජාතික අවශ්‍යතා සඳහා යොදවන බව සඳහන් කළ භාණ්ඩාගාර ලේකම්වරයා, ‘දිත්වේ’ (Ditwah) ආපදා තත්ත්වයට මුහුණ දීමට සහ මැදපෙරදිග ගැටුම් හේතුවෙන් ඉහළ ගිය ඉන්ධන මිලට එරෙහිව ජනතාවට සහන සැලසීමට රජයට රුපියල් බිලියන 500ක ප්‍රතිපාදන වෙන් කිරීමට මෙම ආදායම් දායකත්වය මහෝපකාරී වූ බව අවධාරණය කළේය. එසේම, තාක්ෂණය භාවිතයෙන් රේගු මෙහෙයුම් නවීකරණය කිරීමේ සහ කඩදාසි රහිත ප්‍රකාශන වැඩසටහන සාර්ථක කර ගැනීමේ වැදගත්කම පැහැදිලි කළ ඔහු, ජාත්‍යන්තර ණය ශ්‍රේණිගත කිරීම්වලදී ආර්ථික ස්ථාවරත්වය තහවුරු කිරීම සඳහා කාර්යක්ෂම ආදායම් එකතු කිරීමක වැදගත්කමද පෙන්වා දුන්නේය. රේගු අධ්‍යක්ෂ ජනරාල් විමල් ලියනගමගේ මහතාද මෙහිදී අදහස් දක්වමින්, රේගු නිලධාරීන්ගේ වෘත්තීය විශිෂ්ටත්වය සහ කැපවීම අගය කළේය.
