මුව මස් සන්තකයේ තබාගැනීම සම්බන්ධයෙන් සිදුකළ විමර්ශනයකදී දීර්ඝ කාලයක් තිස්සේ පවත්වාගෙන ගිය බවට සැක කෙරෙන වනසත්ත්ව මස් ජාවාරමක් අනාවරණය කරගෙන තිබේ.
හෙනානිගල වනජීවී කාර්යාලයට ලැබුණු තොරතුරකට අනුව, පසුගිය 25 වැනිදා මාදුරුඔය ජාතික උද්‍යානයට මායිම්ව පිහිටි කුඩාගල ප්‍රදේශයේ සිදුකළ වැටලීමකදී නිවසක තිබී මුව මස් කිලෝග්‍රෑම් 4යි ග්‍රෑම් 600ක් සොයාගෙන ඇත. එහිදී නිවසේ හිමිකරු වන 31 හැවිරිදි පුද්ගලයෙකු අත්අඩංගුවට ගෙන තිබේ.
සැකකරුගෙන් දීර්ඝ ලෙස ප්‍රශ්න කිරීමෙන් අනතුරුව, ඔහු සහ පියා විසින් පවත්වාගෙන ගිය පරණ භාණ්ඩ එකලස් කිරීමේ ව්‍යාපාරික ස්ථානයක් ද පරීක්ෂා කර ඇත. එහි අධිශීතකරණයක තිබී වඳවීමේ තර්ජනයට ලක්ව ඇති කබල්ලෑවෙකුගේ මස්, ගෝන මස්, ඉත්තෑ මස්, වල් ඌරු මස්, මියගිය මුවෙකුගේ වලිග කොටසක් සහ වනසතුන්ගේ රුධිරය සහිත බෝතලයක් සොයාගෙන තිබේ.
මුවෙකුගේ වලිග කොටස භාවිත කරමින් මස් දඩමස් බවට තහවුරු කර පාරිභෝගිකයන්ගේ විශ්වාසය දිනාගැනීමට කටයුතු කර ඇති බවට විමර්ශනවලදී කරුණු අනාවරණය වී ඇත. මෙම ජාවාරමට සම්බන්ධ තවත් සැකකරුවන් අත්අඩංගුවට ගැනීම සඳහා විමර්ශන ක්‍රියාත්මක වේ.
සැකකරු සහ නඩු භාණ්ඩ පසුගිය 26 වැනිදා දෙහිඅත්තකණ්ඩිය මහේස්ත්‍රාත් අධිකරණයට ඉදිරිපත් කිරීමෙන් පසු, ඔහු නොවැම්බර් 6 වැනිදා දක්වා රක්ෂිත බන්ධනාගාරගත කිරීමට නියෝග කර තිබේ.
වනසත්ත්ව හා වෘක්ෂලතා ආරක්ෂක ආඥා පනත යටතේ ආරක්ෂිත වනසතුන් මෙවැනි ජාවාරම් හේතුවෙන් මරණයට පත්වන බැවින්, වනජීවී අපරාධ පිළිබඳ තොරතුරු දන්නේ නම් 1992 හදිසි දුරකථන අංකයට දැනුම් දෙන ලෙස වනජීවී සංරක්ෂණ දෙපාර්තමේන්තුව මහජනතාවගෙන් ඉල්ලා සිටියි.
