කුඩා හා මධ්‍යම පරිමාණ ව්‍යවසායකයින්ගේ නිෂ්පාදන ජාත්‍යන්තර වෙළෙඳපොළ ජයගැනීම සඳහා සූදානම් කළ යුතු බවත්, ඒ සඳහා මුද්‍රණ නිමාව හා ඇසුරුම්කරණය ඉතා වැදගත් වන බව කර්මාන්ත හා වාණිජ කටයුතු අමාත්‍ය රිෂාඩ් බදියුදීන් මහතා පවසයි.
අමාත්‍යවරයා මේ බව පැවසුවේ පසුගියදා බණ්ඩාරනායක ජාත්‍යන්තර අනුස්මරණ සම්මන්ත්‍රණ ශාලාව (BMICH) හි පැවති “Lanka Pak 2018” මුද්‍රණ හා ඇසුරුම්කරණ ප්‍රදර්ශනය විවෘත කිරීමේ අවස්ථාවට සහභාගී වෙමින්.
එහිදී අමාත්‍යවරයා කියා සිටියේ ප්‍රමිතියෙන් ඉහළ ශ්‍රී ලාංකීය අනන්‍යතාව සහිත මුද්‍රණ හා ඇසුරුම් අපනයන මගින් ජාත්‍යන්තර වෙළෙඳපොළෙන් හොඳ ආදායමක් උපයාගත හැකි බවයි.
මෙම ප්‍රදර්ශනය සඳහා මුද්‍රණ හා ඇසුරුම්කරණ ක්‍ෂේත්‍රයේ කුඩා හා මධ්‍යම පරිමාණ ව්‍යවසායකයින් ප්‍රදර්ශන කුටි 150 කට වැඩි ප්‍රමාණයක් පවත්වනු ලැබීය. ආසියාවේ ඇසුරුම්කරණ සම්මේලනයේ සහාය ඇතිව ශ්‍රී ලංකා ඇසුරුම්කරණ ආයතනය විසින් මෙම ප්‍රදර්ශනය සංවිධානය කර තිබුණි.
මෙහිදී වැඩි දුරටත් අදහස් දැක් වු අමාත්‍යවරයා ” අනෙකුත් ව්‍යාපාර ක්‍ෂේත්‍ර මෙන්ම මෙම ඇසුරුම්කරණ හා මුද්‍රණ කර්මාන්ත ක්‍ෂේත්‍රය ද මේ වන විට මුළු ලෝකයේම තර්ජනයට ලක් වෙලා තියෙනවා. මීට ප්‍රධානතම හේතුව වී තිබෙන්නේ, පිට ඇසුරුම් හා ප්‍රතිචක්‍රීයකරණය කළ නොහැකි මට්ටමේ ඇසුරුම් නිසා, ලෝකයේ බොහෝ රටවල් මෙන්ම අප වැනි රටවල් ද විශාල අභියෝගයන්ට මුහුණ දී ලා තියෙනවා. එම නිසා අපි මේ වන විට නැවත නැවතත් භාවිතයට ගත හැකි, එසේම වෙනත් අවශ්‍යතා සඳහා ද නැවත භාවිතා කළ හැකි නවෝත්පාදන ඇසුරුම්කරණ විසඳුම් සොයමින් සිටිනවා. මේ නිසා පාරිභෝගික පසු ඇසුරුම්කරණය දේශීය හා විදේශීය වශයෙන් සුවිශාල වූ අභියෝගවලට මුහුණ දීලා තියෙනවා. එම අභියෝග ජය ගෙන එක්සත් ජාතීන්ගේ ගෝලීය ඉළක්ක ජයග්‍රහණය කරන්න පරිසර හිතකාමි ඇසුරුම්කරණය සඳහා අපි යොමු විය යුතුයි. ඒ සඳහා ජනාධිපතිතුමා අගමැතිතුමා අපිට සුවිශාල සහයෝගයක් ලබා දෙමින් පරිසර හිතකාමී ඇසුරුම් සඳහා දිරිය ශක්තිය ලබා දෙනවා. එම නිසා අපට ඇසුරුම්කරණ ක්‍ෂේත්‍රයේ සුවිශාල ජයග්‍රහණ රැසක්ම හිමි කර ගැනීමට හේතු වෙනවා.” යැයි පැවසීය.
මෙම අවස්ථාවට මුදල් රාජ්‍ය අමාත්‍ය එරාන් වික්‍රමරත්න, ඉන්දියා නියෝජ්‍ය මහ කොමසාරිස් ශිල්පා එන්. ඇම්බුලේ, ශ්‍රී ලංකා ඇසුරුම්කරණ ආයතනයේ සභාපති අනුරාධ ජයසිංහ, ආසියානු ඇසුරුම්කරණ ස්මමේලනයේ සභාපති රොහාන් වික්‍රමසිංහ, ඇසුරුම්කරණ සංවර්ධන ක්‍ෂේත්‍රයේ සභාපිත ජේ.ඩී.සී. පෙරේරා මහත්වරුද මෙහිදී අදහස් දැක්වීය.
