අපේ ජනාධිපතිවරයාත්, අගමැතිවරයාත් රටේ අනාගතය, ජනතාවගේ සුභසිද්ධීය වෙනුවෙන් නව දේශපාලන සංස්කෘතියක් හදුන්වාදී තිබෙන්නේ ජනතාවගේත්, රටේත් සුබසිද්ධිය වෙනුවෙන්” බව විදුලිබල, බලශක්ති සහ ව්‍යාපාර සංවර්ධන අමාත්‍ය රවී කරුණානායක මහතා පවසයි.
අමාත්‍යවරයා මේ බව පැවසුවේ, පසුගිය දින යාපනය යූනියන් පාසලේ නව ගොඩනැගිල්ලක් සිසු අයිතියට පත්කිරීමේ අවස්ථාවට සහභාගි වෙමිනි. 2017 වර්ෂයේදී මෙම ගොඩනැගිල්ල සඳහා මුල්ගල තබන ලද අතර, ඒ සඳහා මිලියන 55ක් වැය වන ලදී.
මෙහිදී වැඩිදුරටත් අදහස් දැක්වූ අමාත්‍ය කරුණානායක මහතා, ” අපි 2015 දී මැතිවරණයට එද්දි විධායක ජනාධිපති ක්‍රමය අහෝසි කරන්න පොරොන්දු වුණා. ජනතාව අපිව විශ්වාස කළා. අද අපි ඒ ජනතාවට සවන් දියයුතුයි. අපේ පොරොන්දුව ඉටුකල යුතුයි. මම සතුටු වෙනවා දෙමල ජාතික සංධානයත් අපේ මතයට එකගවීම පිළිබදව. අපිට දේශපාලඥයින් අවශ්‍යයි. නමුත් සැබෑ දේශපාලඥයින් සිතිය යුත්තේ රටේ අනාගතය ගැන මිසක්, ඉදිරි මැතිවරණයක් ගැන නොවෙයි. සැබෑ දේශපාලඥයෙක්ගේ වෙනස මේකයි. මේ රටේ මෙන්ම ආර්ථිකයේ සැබෑ වෙනසක්, රැඩිකල් වෙනසක් ඇතිකළ යුතු කාලය දැන් එළඹිලා. නැවුම් ආකාරයෙන් සිතිය යුතු කාලය දැන් එළඹිලා. ශක්තිමත්ව සිතිය යුතු කාලය එළඹිලා. අපිට දැන් අවස්ථාවක් උදා වෙලා තිබෙන්නේ . අපි මේ අවස්ථාවෙන් ප්‍රයෝජන ගත යුතුයි. මේ රටේ ජීවත්වන දෙමළ, මුස්ලිම්, බර්ගර්, මැලේ යන සෑම ජාතියකටම, සෑම ආගමක් අදහන කෙනෙකුටම මේක මගේ රට යන හැගීමෙන් කටයුතු කළ හැකි තත්ත්වයක් උදාකළ යුතුයි. මේ ප්‍රදේශයේ පවතින විදුලි ගැටළු විසදාදීමටත්, ජනතාවගේ විදුලි අවශ්‍යතා සියල්ල හැකි ඉක්මණින් සපුරාලීමට කටයුතු කරන්න මම පොරොන්දු වෙනවා” අමාත්‍යවරයා පැවසිය.
