එක්සත් ජාතික පක්ෂයේ හා එක්සත් ජාතික පෙරමුණේ ජනාධිපති අපේක්ෂක සජිත් ප්‍රේමදාස අමාත්‍යතුමා ජනාධිපතිවරණයේ දී ලබන ජයග්‍රහණය මත එම පක්ෂයේ හා පාක්ෂිකයන් ගේ අනාගතය රැඳී පවතින බැවින් ඉදිරි මාස එක හමාර තුළ ජනපතිවරණය ජයග්‍රහණයකරා ගෙන යන සටන සිදු කිරිමට හදවතින්ම කැප විය යුතු බව එක්සත් ජාතික පක්ෂයේ මහා ලේකම්, අධ්‍යාපන අමාත්‍ය නීතිඥ අකිල විරාජ් කාරියවසම් මහතා පවසයි.
ඒ මහතා මේ බව පැවසුවේ එක්සත් ජාතික පක්ෂයේ ආසන සංවිධායකයන් සහ දිස්ත්‍රීක් කළමණාකරුවන් සඳහා කෝට්ටේ සිරිකොත මන්දිරයේ ඊයේ (30) පෙරවරුවේ දී පැවති රැස්වීම අමතමිනි.
එහිදී අමාත්‍යවරයා කියා සිටියේය ” නැවත වතාවක් එක්සත් ජාතික පක්ෂයට රාජ්‍ය නායකත්වය ලබා ගැනීමේ සටන අද ආරම්භකර තිබෙනවා. දීර්ඝ කාලයක් එක්සත් ජාතික පක්ෂයට ජනාධිපති ධූරය තිබුනේ නැහැ,ඒ බව ඔබතුමන්ලා දන්නවා. ඒනිසා අපට, අපේ පාක්ෂිකයන්ට කටයුතුඉටුකර දීමේ දී විවිධ ප්‍රශ්නවලට මුහුණ දීමට සිදු වුණ. මේ හැම ප්‍රශ්නයකට ම විසඳුමක් දෙන්න එදා කෘත්‍යාධිකාරී මණ්ඩලයේ දී එක්සත් ජාතික පක්ෂයේ නායක රනිල් වික්‍රමසිංහ අග්‍රාමාත්‍යතුමා ඉතාමත්ම හොඳ තීරණයක් ගත්තා. හැමෝම එකතු කර ගනිමින් පක්ෂයේ එකමුතුකම ආරක්ෂා කරමින්, එතුමා ඒ ගත් තීරණය අනුව පක්ෂය නැවතත් අද එක්සත් වෙලා තියනවා , එකමුතු වෙලා තියනවා. කිසිම බලවේගයකට අපේ මේ එකමුතු කම කඩන්න බැරි තැනකට අද ඇවිල්ලා තියනවා. අපේ එක්සත් ජාතික පක්ෂය වටා අද සියළුම පක්ෂ එකතු වෙලා තියනවා. යැයි අමාත්‍යවරයා කියා සිටියේය.
