ඇල්පිටිය ප්‍රාදේශීය සභා ඡන්ද විමසීම අද (11දා) දින පෙරවරු 07 ට ආරම්භ විය. සභිකයන් 28 දෙනෙකු තෝරාපත් කරගැනීම සඳහා පැවැත්වෙන මැතිවරණය සඳහා ඡන්දදායකයන් 53,384 සුදුසුකම් ලබා තිබේ.
කොට්ඨාස මට්ටමින් සභිකයන් 17 දෙනෙකු තෝරාපත් කරගන්නා අතර, අතිරේක ලැයිස්තුවෙන් සභිකයන් 11 දෙනෙකු තෝරාපත් කර ගැනීමට නියමිතය.
එක්සත් ජාතික පක්‍ෂය, එක්සත් ජනතා නිදහස් සන්ධානය, ශ්‍රී ලංකා පොදුජන පෙරමුණ, ජනතා විමුක්ති පෙරමුණ, ප්‍රජාතන්ත්‍රවාදී එක්සත් ජාතික පෙරමුණ ඡන්ද සඳහා තරග කරයි.
ඇල්පිටිය ප්‍රාදේශීය සභා ඡන්ද විමසීමට අදාළ තැපැල් ඡන්ද සලකුණු කිරීම පසුගිය 27 වැනිදා හා මේ මස 04 වැනිදා පැවැත්විණි.
ඇල්පිටිය ප්‍රාදේශීය සභා බලසීමව තුළ හා ගාල්ල දිස්ත්‍රික්ක මැතිවරණ කාර්යාලයට අද දිනයේදී විශේෂ පොලිස් ආරක්‍ෂාවක්ද ලබාදී ඇත.
ඡන්ද කොට්ටඨාශ 17 හි පිහිටි ඡන්ද මධ්‍යස්ථානවලදී ගණනය කිරීම සිදු කෙරේ. රාත්‍රී 7.00 පමණ වනවිට ඡන්ද ගණන් කිරීම අවසන් කිරීමට බලාපොරොත්තු වන අතර සමස්ත ඡන්ද ප්‍රතිඵලය නිකුත් කිරීම ඇල්පිටිය වෘත්තීය පුහුණු ආයතන ගොඩනැගිල්ලේ සිදු කරන බවත් සමස්ත ඡන්ද ප්‍රතිඵලය රාත්‍රී 10ට පමණ නිකුත් කිරීමට අපේක්ෂා කරන බව මැතිවරණ කොමිෂන් සභාව පවසයි.
