“එක රටක්, එක නීතියක්” සඳහා වන ජනාධිපති කාර්ය සාධක බලකාය මහජන අදහස් විමසීම ඊයේ (20 ) වව්නියාව දිස්ත්‍රික්කයෙන් ආරම්භ කෙරිණ.
අද (21) යාපනය වාලම්පුරි ශාලාවේ දී අදහස් විමසීම සිදු විය. නීතිඥයන්, වෘත්තිකයන්, ආගමික නායකයන්, ශිෂ්‍යයන් සහ සිවිල් ජනතාව නීතිය සමානව ක්‍රියාත්මක නොවීමට අදාළව විවිධ පැතිකඩ ඔස්සේ කාර්ය සාධක බලකාය හමුවේ අදහස් දක්වනු ලැබීය. හෙට (22) මුලතිව් සහ කිලිනොච්චි දිස්ත්‍රික්කවලදී ජනතාව හමු වන බවත්, ඉදිරියේදී දිවයිනේ සෙසු පළාත් 8 ද ආවරණය කරමින් ජනතා අදහස් විමසීම සිදු කෙරෙන බවත් කාර්ය සාධක බලකාය පවසයි.
වව්නියාව බෝගස්වැව “උතුරු පළාත් කාබනික ආහාර නිපදවන්නන්ගේ සමිති” කාර්යාලයේ දී සහ වව්නියාව දිස්ත්‍රික් ලේකම් කාර්යාල ශ්‍රවණාගාරයේ දී ඊයේ දිනයේ අදහස් විමසීම සිදු කෙරිණ.
ශ්‍රී ලංකාව තුළ “එක රටක්, එක නීතියක්” යන සංකල්පය ක්‍රියාත්මක කිරීම සම්බන්ධයෙන් විවිධ පාර්ශ්වයන් දරණ අදහස් හා මතවාදයන් සැලකිල්ලට ගනිමින් එකී සංකල්පය අධ්‍යයනය කිරීමෙන් අනතුරුව ඒ සඳහා ශ්‍රී ලංකාවට ආවේණික වූ සංකල්පමය රාමුවක් සකස් කිරීම සම්බන්ධයෙන් යෝජනා ඉදිරිපත් කිරීම සඳහා ජනාධිපතිතුමා විසින් මෙම කාර්ය සාධක බලකාය ස්ථාපනය කෙරිණි.
2021 නොවැම්බර් 30 වෙනිදා දක්වා
ලේකම්,
“එක රටක්, එක නීතියක්” සඳහා වන ජනාධිපති කාර්ය සාධක බලකාය
තැ.පෙ. 504
කොළඹ.
යන ලිපිනය මගින් මෙන්ම [email protected] යන විද්‍යුත් ලිපිනය ඔස්සේ කමිටුව වෙත අදහස් දැක්විය හැකි අතර, අද සිට පෞද්ගලිකව ද කමිටුව වෙත අදහස් ලබාදිය හැකි බව කමිටු ලේකම්වරිය සඳහන් කළාය.
