රුපියල් මිලියන 17ක මුදලක් එක්සත් ජාතීන්ගේ සංවර්ධන වැඩසටහනෙහි (UNDP) , කලාපීය ආර්ථික සංවර්ධන ආයතනය (REDA) සහ පළාත් සංචාරක දෙපාර්තමේන්තුව එකමුතුවෙන් කලාපීය සංවර්ධනය සදහා වන තිරසාර සංචාරක තෙමස් ව්‍යාපෘතියෙහි අවසන් අදියර දඹුල්ල “ට්‍රොපිකල් විලේජ්” පරිශ්‍රයේදී මධ්‍යම පළාත් ආණ්ඩුකාරවර නීතිඥ ලලිත් යූ. ගමගේ මහතාගේ ප්‍රධානත්වයෙන් ආරම්භ විය.
ඒකාබද්ද තිරසාර සංචාරක ගමනාන්ත සංවර්ධනයේදී නගර සභා, ප්‍රාදේශීය සභා , ප්‍රාදේශීය ලේකම් කාර්යාල ,වන සංරක්ෂණ හා වනජීවී සංරක්ෂණ දෙපාර්තමේන්තු, ආදී සංචාරක සේවාවන් සම්බන්ධ බහු විධ පාර්ශවකරුවන් එකිනෙකට සම්බන්ධ කර ගනිමින් ඍජුවම සංචාරක සපයන්නන් 428 දෙනෙක් විදේශ විනිමය ඉපයීම සදහා අවශ්‍ය දැනුම, කුසලතා හා ආකල්ප ප්‍රතිපෝෂණය ලබාදෙමින් සහ ඔවුන් වෙත දේශීය සහ විදේශීය පිළිගැනීමෙන් යුතු නීත්‍යානුකූල ලියාපදිංචියක් ලබාදෙමින් මෙම ව්‍යාපෘතිය ක්‍රියාත්මක වූ අතර මෙම ව්‍යාපෘතියෙන් අනතුරුවද ඔවුන්ට අවශ්‍ය සහාය ලබාදීම සඳහා වැඩපිළිවෙළක් සකස් කොට ක්‍රියාත්මක කිරීම මෙම ව්‍යාපෘතිය යටතේ සිදුවන අතර, මෙම ව්‍යාපෘතිය සාර්ථක කරගැනීමට ශක්තිය ලබා දුන් සියලු දෙනා අගය කිරීමේ වැඩසටහනක්ද මෙම වැඩසටහනට සමගාමීව සිදුවිය.
මෙම අවස්ථාවට දඹුල්ල මහ නගර සභාවේ නගරාධිපති ජාලිය ඕපාත මහතා ඇතුළු මහජන නියෝජිතයින්, මධ්‍යම පළාත් ප්‍රධාන ලේකම් ගාමිණී රාජරත්න , පළාත් ප්‍රධාන අමාත්‍යංශ ලේකම් අජිත් ප්‍රේමසිංහ, , කලාපීය ආර්ථික සංවර්ධන ආයතනයේ සභාපති ජානක සකලසූරිය,පළාත් පාලන කොමසාරිස් මේනක හේරත්,ප්‍රාදේශීය ලේකම්වරුන්, මධ්‍යම පළාත් සංචාරක අධ්‍යක්ෂකතුමිය, වන සංරක්ෂණ හා වනජීවී සංරක්ෂණ දෙපාර්තමේන්තු නියෝජිතයින්, සංචාරක සේවා සපයන්නන්, සංචාරක නිෂ්පාදකයින්,සබරගමු සරසවියේ මහාචාර්ය අතුල ඥනපාල, මහාචාර්ය ඒ.එස්. එම්. අස්ලාම් යන මහත්ම මහත්මීන් ඇතුළු සම්පත් දායකයින් පිරිසක් ද එක් විය.
මාතලේ මහේෂ් කිර්තිරත්න
