කුමන ජාතික වන උද්යානය තුළ සතුන් දඩයම් කර, එම මස් බෝට්ටු මඟින් ප්රවාහනය කරමින් තිබූ මහා පරිමාණ දඩමස් ජාවාරමක් වැටලීමට පොලිස් විශේෂ කාර්ය බලකායේ (STF) අරුගම්බේ කඳවුරේ නිලධාරීන් සමත් වී තිබේ. ඊයේ (18) සිදු කළ මෙම වැටලීම්වලදී සැකකරුවන් හයදෙනෙකු අත්අඩංගුවට ගෙන ඇත.
විශේෂ කාර්ය බලකාය විසින් කුඩා කල්ලි වෙරළ තීරයේදී සිදු කළ වැටලීමකදී බටු කැස්බෑවන්ගේ යැයි සැක කෙරෙන බිත්තර 57ක් සමඟ සැකකරුවන් දෙදෙනෙකු මුලින්ම කොටු කරගන්නා ලදී. අනතුරුව කොට්ටු කල්ලිය වෙරළ තීරයේදී සිදු කළ තවත් මෙහෙයුමකදී ගෝන මස් කිලෝ 17ක්, කුළුහරක් මස් කිලෝ 56ක් සහ සතුන්ගේ පීකුදු කිලෝ 16ක් සමඟ සෙසු සැකකරුවන් හතරදෙනා අත්අඩංගුවට ගෙන තිබේ.
මස් ප්රවාහනය කිරීමට යොදාගත් අශ්ව බල 25ක එන්ජිමක් සහිත ෆයිබර් බෝට්ටුවක් සහ ඉන්ධන තොගයක් ද මෙහිදී පොලිස් භාරයට ගැනිණි. අත්අඩංගුවට ගත් සැකකරුවන් සහ නඩු භාණ්ඩ ඉදිරි විමර්ශන සහ නීතිමය කටයුතු සඳහා ලාහුගල වනජීවී කාර්යාලය වෙත භාර දී ඇත.
