ඉරානය විසින් දියත් කරන ලද බැලස්ටික් මිසයිලයක් තුර්කියේ ගුවන් සීමාව ඉලක්ක කර ගනිමින් ගමන් කර ඇති අතර, නැගෙනහිර මධ්යධරණී කලාපයේ ස්ථාපනය කර ඇති නේටෝ (NATO) ගුවන් ආරක්ෂක පද්ධති මගින් එය සාර්ථකව බිම හෙළා ඇති බව අද (මාර්තු 04) වාර්තා වේ. තුර්කි ආරක්ෂක අමාත්යාංශය තහවුරු කරන පරිදි, ඉරානයේ සිට දියත් කළ මෙම මිසයිලය ඉරාකය සහ සිරියාව හරහා තුර්කි ගුවන් සීමාව දෙසට ගමන් කර ඇති අතර, එය හතේ (Hatay) පළාතට ආසන්න සිරියානු දේශසීමා ප්රදේශයේදී විනාශ කර තිබේ. මෙම සිදුවීමෙන් කිසිදු පුද්ගල හානියක් සිදුව නොමැති වුවද, එහි සුන්බුන් තුර්කි දේශසීමා ආසන්නයට පතිත වී ඇත.
මෙම ප්රහාරය ලෝක දේශපාලනය තුළ දැඩි නොසන්සුන්තාවක් ඇති කිරීමට සමත්ව ඇත්තේ තුර්කිය නේටෝ සංවිධානයේ ප්රබල සාමාජිකයෙකු වන බැවිනි. නේටෝ ගිවිසුමේ 5 වන වගන්තිය (Article 5) අනුව, එක් සාමාජික රටකට එල්ල වන ප්රහාරයක් සමස්ත සංවිධානයටම එල්ල වූ ප්රහාරයක් ලෙස සලකනු ලබන අතර, මෙම මිසයිලය ඉලක්කයට පතිත වූයේ නම් එය තෙවන ලෝක යුද්ධයක් දක්වා වර්ධනය වීමේ අවදානමක් පැවති බව ආරක්ෂක විචාරකයෝ පෙන්වා දෙති. ඉරානයේ අණදීමේ සහ පාලනය කිරීමේ පද්ධතිය (Command and Control) බිඳ වැටීම හෝ අත්වැරදීමක් හේතුවෙන් මෙම ප්රහාරය එල්ල වන්නට ඇති බවට සැක පළ කෙරේ. තුර්කිය සිය නිල ප්රතිචාරය දක්වමින් ප්රකාශ කර ඇත්තේ තමන්ට එල්ල වන ඕනෑම සතුරු ක්රියාවකට ප්රතිචාර දැක්වීමේ අයිතිය තමන් සතු බවත්, ගැටුම් තවදුරටත් ව්යාප්ත කිරීමෙන් වළකින ලෙස සියලු පාර්ශවයන්ට අනතුරු අඟවන බවත්ය.
