එක්සත් අරාබි එමීර් රාජ්යයට එල්ල වූ මිසයිල සහ ඩ්රෝන ප්රහාර සම්බන්ධයෙන් ජනාධිපති අනුර කුමාර දිසානායක මහතා එරට ජනාධිපති ෂෙයික් මොහොමඩ් බින් සයිඩ් අල් නහියන් (Sheikh Mohamed bin Zayed Al Nahyan) වෙත දුරකථන ඇමතුමක් ලබා දෙමින් ශ්රී ලංකාවේ සහයෝගීතාවය ප්රකාශ කර තිබේ. මෙම ප්රහාරාත්මක ක්රියාවන් හේතුවෙන් සිදු වූ මරණ සහ හානි පිළිබඳව ජනාධිපතිවරයා සිය දැඩි කනගාටුව ද මෙහිදී පළ කර ඇත.
සියලු ආකාරයේ ප්රචණ්ඩත්වයන් සහ ත්රස්තවාදී ක්රියාවන් ශ්රී ලංකාව දැඩි ලෙස හෙළා දකින බව ජනාධිපතිවරයා අවධාරණය කළේය. එක්සත් අරාබි එමීර් රාජ්යයේ ආරක්ෂාව සහ ස්ථාවරත්වය වෙනුවෙන් ශ්රී ලංකාව ස්ථිරව පෙනී සිටින බවත්, පවතින අර්බුදකාරී වාතාවරණය හමුවේ හැකි ඕනෑම ආකාරයකින් සහාය වීමට ශ්රී ලංකාව සූදානම් බවත් ඔහු දන්වා ඇත.
සිය නිල X (ට්විටර්) ගිණුමේ සටහනක් තබමින් ජනාධිපතිවරයා ප්රකාශ කළේ, “ශ්රී ලංකාව එක්සත් අරාබි එමීර් රාජ්යය සමඟ ස්ථිරව සිටින අතර, කලාපීය සාමය සහ ආරක්ෂාව වෙනුවෙන් පෙනී සිටින” බවයි. විශේෂයෙන්ම ලක්ෂ දෙකකට ආසන්න ශ්රී ලාංකිකයන් පිරිසක් එමීර් රාජ්යයේ වෙසෙන බැවින්, එරට ආරක්ෂාව ශ්රී ලංකාවට ද සෘජුවම වැදගත් වන කරුණකි.
