විශාඛාපට්නම් හි පැවැති ‘මිලාන්’ (MILAN) යුද අභ්යාසයට සහභාගී වී ආපසු යමින් සිටියදී ගාල්ලට ඔබ්බෙන් වූ මුහුදේදී අමෙරිකානු ටෝපිඩෝ ප්රහාරයකට ලක්වූ ඉරාන ‘ඩෙනා’ (IRIS Dena) නෞකාවේ සිටි පිරිස් මුදාගැනීම සඳහා ඉන්දීය නාවික හමුදාව සිය සහය ලබාදීම ආරම්භ කර තිබේ. ඉන්දීය නාවික හමුදා ප්රකාශනයකට අනුව, ශ්රී ලංකා නාවික හමුදාව මෙහෙයවන සෝදිසි සහ මුදාගැනීමේ (SAR) කටයුතු ශක්තිමත් කිරීම සඳහා බදාදා (04) පෙරවරු 10:00 ට පමන P8I වර්ගයේ දිගුදුර මුහුදු නිරීක්ෂණ යානයක් යොදවා ඇත. මීට අමතරව, ගුවනේ සිට මුහුදට දැමිය හැකි ජීවිතාරක්ෂක පාරු (Life rafts) සහිත තවත් ගුවන් යානයක් සීරුවෙන් තබා ඇති බව ද වාර්තා වේ.
මෙම මානුෂීය මෙහෙයුම සඳහා ‘INS තරංගිණී’ (INS Tarangini) නෞකාව දායක වී ඇති අතර, කොචින් වරායේ සිට ‘INS ඉක්ශාක්’ (INS Ikshak) නෞකාව ද අතුරුදන් වූ නාවිකයන් සෙවීම සඳහා එම මුහුදු සීමාවට පැමිණ තිබේ. පසුගිය මාර්තු 04 වැනිදා අලුයම කොළඹ සමුද්රීය සෙවීම් සහ මුදාගැනීම් සම්බන්ධීකරණ මධ්යස්ථානය (MRCC Colombo) වෙත ලැබුණු හදිසි පණිවිඩයකට අනුව මෙම මෙහෙයුම් ක්රියාත්මක වේ. ප්රහාරයට ලක්වන අවස්ථාව වන විට ඉරාන නෞකාව ගාල්ලේ සිට නාවික සැතපුම් 20ක් බටහිර දෙසින් වූ ශ්රී ලංකාවට අයත් සෙවීම් සහ මුදාගැනීම් කලාපය තුළ ගමන් කරමින් තිබූ බව ඉන්දීය නාවික හමුදාව තහවුරු කළේය.
