ඉදිරි සිංහල සහ හින්දු අලුත් අවුරුදු සමයේදී ජනතාවට සහනදායී මිලකට මත්ස්ය නිෂ්පාදන ලබාදීම සඳහා ධීවර සංස්ථාව විශේෂ වැඩපිළිවෙළක් සකස් කර තිබේ. ‘අලුත් අවුරුද්දට අලුත් මාළු අලුත් මිලට’ යන තේමාව යටතේ කොප්පරා සහ සප්පරා වැනි මසුන් අඩු මිලට ජනතාව වෙත ලබාදීමට කටයුතු කරන ලෙස ධීවර, ජලජ හා සාගර සම්පත් අමාත්ය රාමලිංගම් චන්ද්රසේකර් මහතා ඊයේ (06) නිලධාරීන්ට උපදෙස් ලබා දුන්නේය.
මීට අමතරව ධීවර සංස්ථාවේ සේවක සුබසාධනය වෙනුවෙන් ද වැදගත් තීරණ කිහිපයක් ගෙන ඇත. ඒ අනුව සේවක අර්ථසාධක අරමුදල් (EPF) සහ පාරිතෝෂික (Gratuity) දීමනා ගෙවීම කඩිනම් කිරීමටත්, මෑතකදී ලබා දුන් රුපියල් 10,000ක දිරි දීමනාව අඛණ්ඩව පවත්වාගෙන යාමටත් රජය තීරණය කර තිබේ.
ආයතනයේ යටිතල පහසුකම් සංවර්ධනය යටතේ ජපන් ආධාර මත ලැබෙන අධිශීතකරණ ට්රක් රථ ව්යාපෘතිය සහ රුපියල් මිලියන 86ක වියදමින් ඉදිකෙරෙන මෙට්රික් ටොන් 150ක නව අධිශීතනාගාරයේ කටයුතු ද කඩිනම් කිරීමට නියමිතය. ධීවර සංස්ථා සභාපති මොහොමඩ් නෞරාස් නසාර් මහතා සඳහන් කළේ, ඉදිරියේදී ත්රිරෝද රථ මගින් රට අභ්යන්තරයට මත්ස්ය නිෂ්පාදන බෙදා හැරීමේ ජාලයක් ද ආරම්භ කරන බවයි.
