ඇමෙරිකානු ජනාධිපති ඩොනල්ඩ් ට්රම්ප් සහ හිටපු ජනාධිපති ජෝ බයිඩන් ඇතුළු ප්රමුඛ පෙළේ දේශපාලනඥයන් ඝාතනය කිරීමට කුමන්ත්රණය කළ බවට චෝදනා ලැබූ 47 හැවිරිදි පාකිස්ථාන ජාතිකයෙකු වන අසීෆ් මර්චන්ට් (Asif Merchant) නිව්යෝර්ක් ෆෙඩරල් අධිකරණයක් විසින් ඊයේ (06) වැරදිකරු ලෙස ප්රකාශයට පත් කරන ලදී. ඔහු ඉරාන ඉස්ලාමීය විප්ලවවාදී ආරක්ෂක බලකායේ (IRGC) නියෝජිතයෙකු ලෙස කටයුතු කර ඇති බවට ඇමෙරිකානු අධිකරණ දෙපාර්තමේන්තුව චෝදනා කරයි.
නඩු විභාගයේදී අනාවරණය වූ පරිදි, මර්චන්ට් 2024 අප්රේල් මාසයේදී ඇමෙරිකාවට පැමිණ ඇත්තේ දේශපාලන ඝාතන සිදු කිරීම සඳහා කුලී ඝාතකයන් බඳවා ගැනීමට සහ වැදගත් ලේඛන සොරකම් කිරීමටය. ඔහු ජූනි මාසයේදී ඝාතකයන් යැයි සිතා සාකච්ඡා පවත්වා ඇත්තේ ඇමෙරිකානු රහස් පරීක්ෂකයන් සමඟ වන අතර, ඔහු රටින් පිටවීමට උත්සාහ කිරීමේදී ටෙක්සාස්හිදී අත්අඩංගුවට ගෙන තිබේ.
අසීෆ් මර්චන්ට් අධිකරණය හමුවේ පාපොච්චාරණය කරමින් කියා සිටියේ ජනාධිපති ඩොනල්ඩ් ට්රම්ප්, ජෝ බයිඩන් සහ හිටපු එක්සත් ජාතීන්ගේ තානාපතිනි නිකී හේලි (Nikki Haley) සිය ඉලක්කයන් වූ බවයි. කෙසේ වෙතත්, තමා මෙම කුමන්ත්රණයට සම්බන්ධ වූයේ ඉරානයේ සිටින තම පවුලේ සාමාජිකයන්ගේ ආරක්ෂාව වෙනුවෙන් බවත්, අවසානයේ මෙම තොරතුරු ඇමෙරිකානු බලධාරීන්ට හෙළි කිරීමට තමා අදහස් කර සිටි බවත් ඔහු සිය ආරක්ෂාව වෙනුවෙන් ප්රකාශ කර ඇත. ත්රස්තවාදය වැලැක්වීමේ පනත යටතේ වැරදිකරු වූ ඔහුට ජීවිතාන්තය දක්වා සිරදඬුවම් නියම වීමට ඉඩ පවතී.
