ඉරානය සහ අමෙරිකා-ඉශ්රායල හවුල්කාරීත්වය අතර හටගෙන ඇති යුදමය තත්ත්වය හේතුවෙන් ලෝක වෙළඳපොළේ බොරතෙල් මිල ශීඝ්රයෙන් ඉහළ යාම පාලනය කිරීම සඳහා රුසියානු තෙල් මත පනවා ඇති සම්බාධක තවදුරටත් ලිහිල් කිරීමට අමෙරිකානු රජය සලකා බලමින් සිටින බව වාර්තා වේ. අමෙරිකානු ජනාධිපති ඩොනල්ඩ් ට්රම්ප් සහ රුසියානු ජනාධිපති ව්ලැදිමීර් පුටින් අතර පසුගිය සඳුදා (09) පැවති දුරකථන සාකච්ඡාවකින් පසු මෙම තීරණය පිළිබඳ ඉඟි පළ වූ අතර සම්බාධක ලිහිල් කිරීම කාලය සහ විෂය පථය අනුව ඉතා සීමිත වනු ඇති බව අමෙරිකාව අවධාරණය කර තිබේ.
දැනටමත් මුහුදේ පවතින රුසියානු තෙල් නෞකා ඉන්දියාවට ආනයනය කිරීම සඳහා අමෙරිකාව අප්රේල් 03 වනදා දක්වා වලංගු විශේෂ අවසරයක් ලබා දී ඇත. G7 රටවල මුදල් අමාත්යවරුන්ගේ සාකච්ඡාවකදී අමෙරිකාව පවසා ඇත්තේ මෙම සහනය හරහා රුසියාවට විශාල ආදායමක් ලැබීමට ඉඩ නොදෙන නමුත් ගෝලීය තෙල් මිල ස්ථාවර කිරීම මෙහි ප්රධාන අරමුණ බවයි. හොර්මුස් සමුද්ර සන්ධිය හරහා තෙල් ප්රවාහනය අඩාල වීමත් සමඟ ලෝක වෙළඳපොළේ තෙල් මිල බැරලයක් ඩොලර් 120 දක්වා ඉහළ ගිය අතර අමෙරිකාවේ මෙම නව නිවේදනයත් සමඟ මිල ගණන් යම් මට්ටමකට පහත වැටී තිබේ.
