අමෙරිකානු ජනාධිපති ඩොනල්ඩ් ට්රම්ප්ගේ බදු ප්රතිපත්තිවලට අදාළ තීරණාත්මක කොටසක් එරට ශ්රේෂ්ඨාධිකරණය විසින් පසුගිය මාසයේදී අවලංගු කිරීමත් සමඟ, අමෙරිකාව සිය ප්රධාන වෙළඳ හවුල්කරුවන්ට එරෙහිව නව පරීක්ෂණයක් ආරම්භ කර තිබේ. අමෙරිකානු වෙළඳ නියෝජිත ජේමිසන් ග්රීර් (Jamieson Greer) ප්රකාශ කර ඇත්තේ, ‘Section 301’ යටතේ සිදුකරන මෙම අසාධාරණ වෙළඳ පිළිවෙත් පිළිබඳ පරීක්ෂණය හේතුවෙන් චීනය, ඉන්දියාව, යුරෝපා සංගමය, ජපානය, දකුණු කොරියාව සහ මෙක්සිකෝව වැනි රටවලට එරෙහිව ලබන ගිම්හානය වන විට නව ආනයනික බදු පැනවීමට ඉඩ ඇති බවයි.
අසාධාරණ වෙළඳ පිළිවෙත්වල නිරත වන බවට තහවුරු වන ඕනෑම රටකින් පැමිණෙන භාණ්ඩ සඳහා අතිරේක බදු පැනවීමට මෙම පරීක්ෂණය හරහා අමෙරිකාවට අවස්ථාව හිමි වේ. ජනාධිපති ට්රම්ප් විසින් පෙබරවාරි අග භාගයේදී පනවන ලද තාවකාලික බදු පැනවීම් ජූලි මාසයේදී අවසන් වීමට පෙර මෙම පරීක්ෂණ නිම කිරීමට බලාපොරොත්තු වන බව ග්රීර් වැඩිදුරටත් අවධාරණය කර ඇත. තවදුරටත් අමෙරිකානු කාර්මික පදනම වෙනත් රටවල් වෙනුවෙන් පාවා දීමට තමන් සූදානම් නොමැති බව පවසමින් දියත් කර ඇති මෙම පියවර හේතුවෙන් ගෝලීය වෙළඳපොළ තුළ අලුත් ආතතියක් නිර්මාණය වී තිබේ.
