ඉන්දියානු සාගරය ආශ්රිත රටවල සංගමයේ (IORA) මූලධර්ම කෙරෙහි ශ්රී ලංකාව දක්වන අඛණ්ඩ කැපවීම විදහා දක්වමින්, 2026 අයෝරා දිනය සැමරීම සහ සාගර විද්යා හා පරිසරය පිළිබඳ අයෝරා විශිෂ්ටතා මධ්යස්ථානය නිල වශයෙන් විවෘත කිරීම පසුගිය මාර්තු 11 වනදා සිදු විය. විදේශ කටයුතු, විදේශ රැකියා සහ සංචාරක අමාත්යාංශය හා ශ්රී ලංකා සාගර විශ්වවිද්යාලය එක්ව සංවිධානය කළ මෙම උත්සවය විදේශ කටයුතු හා විදේශ රැකියා නියෝජ්ය අමාත්ය අරුන් හේමචන්ද්ර මහතාගේ ප්රධානත්වයෙන් පැවැත්විණි.
“අයෝරා ජීවන තත්ත්වය නංවාලයි” (IORA Enhances Livelihoods) යන 2026 වසරේ තේමාව යටතේ පැවති මෙම සැමරුමේදී, සාගර පාලනය සහ පාරිසරික තිරසාරභාවය වෙනුවෙන් කලාපීය සහයෝගීතාවයේ ඇති වැදගත්කම අවධාරණය කෙරිණි. මෙහිදී අදහස් දැක්වූ නියෝජ්ය අමාත්යවරයා සඳහන් කළේ අලුතින් විවෘත කරන ලද විශිෂ්ටතා මධ්යස්ථානය, ඉන්දියානු සාගර කලාපය පුරා පර්යේෂණ, දැනුම හුවමාරුව සහ ශක්යතා සංවර්ධනය සඳහා ප්රධාන මධ්යස්ථානයක් ලෙස ක්රියා කරනු ඇති බවයි. මෙය විද්යාව පාදක කරගත් සාගර පාලනයකට සහය වීම සඳහා ගත් වැදගත් සන්ධිස්ථානයකි.
අයෝරා මහලේකම් සංජීව් රන්ජන් මහතා ද මාර්ගගත තාක්ෂණය ඔස්සේ මෙම අවස්ථාවට සිය සුබපැතුම් එක් කළ අතර, බටහිර ඕස්ට්රේලියානු විශ්වවිද්යාලයේ මහාචාර්ය චරිත පට්ටිආරච්චි මහතා විසින් ප්රධාන දේශනය පවත්වන ලදී. කලාපීය සාගර ගැටලු පිළිබඳ සංවාදය ඉදිරියට ගෙන යාම සඳහා වෙබ් සම්මන්ත්රණ මාලාවක් ද මෙහිදී ආරම්භ කෙරුණු අතර, අයෝරා සාමාජික රටවල දූත මණ්ඩල ප්රධානීන් ඇතුළු දෙස් විදෙස් පාර්ශ්වකරුවන් රැසක් මෙම අවස්ථාවට එක්ව සිටියහ.
