ඇල්ල – වැල්ලවාය ප්රධාන මාර්ගයේ වැල්ලවාය පොලිස් බල ප්රදේශයට අයත් රන්දෙනිය ප්රදේශයේදී අද (13) උදෑසන දරුණු රිය අනතුරක් සිදුව තිබේ. අධික වේගයෙන් ධාවනය වූ වෑන් රථයක් රියදුරාට පාලනය කරගත නොහැකිව මාර්ගයෙන් ඉවතට පැන පෙරළී යාමෙන් මෙම අනතුර සිදුව ඇති බව වාර්තා වේ.
අනතුර සිදුවන අවස්ථාවේදී වෑන් රථය තුළ කිහිපදෙනෙකු ගමන් කර ඇති අතර, ඔවුන් සුළු තුවාල ලබා ඇති බව වැල්ලවාය පොලිසිය සඳහන් කරයි. මීදුම් සහිත කාලගුණය හෝ රියදුරාට මඟ හැරුණු වංගුවක් හේතුවෙන් රථය මාර්ගයෙන් ඉවතට යන්නට ඇති බව මූලික පරීක්ෂණවලදී සැක කෙරේ. අනතුර හේතුවෙන් වෑන් රථයට දැඩි හානි සිදුව ඇති අතර, ප්රදේශවාසීන් එක්ව තුවාල ලැබූවන් රෝහල් ගත කිරීමට පියවර ගෙන ඇත.
ඇල්ල – වැල්ලවාය මාර්ගය දැඩි වංගු සහිත මෙන්ම ප්රපාතාකාර බැවින් එම මාර්ගයේ ගමන් ගන්නා රියදුරන් වඩාත් විමසිලිමත් විය යුතු බව පොලිසිය අවධාරණය කරයි. අනතුර සම්බන්ධයෙන් වැඩිදුර විමර්ශන කටයුතු වැල්ලවාය පොලිස් රථවාහන අංශය විසින් සිදු කරනු ලබයි.
