ඉරානය විසින් වසා දමා ඇති හෝර්මුස් සමුද්ර සන්ධිය යළි විවෘත කිරීමේ අරමුණින්, දහස් සංඛ්යාත මැරීන් භටයන් සහ නාවිකයන් පිරිවරාගත් දැවැන්ත උභයජීවී ප්රහාරක නෞකාවක් මැදපෙරදිග කලාපය වෙත යෙදවීමට ඇමෙරිකානු ආරක්ෂක අංශ පියවර ගෙන තිබේ. ඇමෙරිකාව සහ ඊශ්රායලය ඉරානයට පහර දීම ආරම්භ කර දැනට සති තුනකට ආසන්න කාලයක් ගත වී ඇති අතර, ඉරානය විසින් ලෝක තෙල් සැපයුමෙන් 20%ක් ගමන් කරන මෙම තීරණාත්මක මුහුදු මාර්ගය අවහිර කිරීම නිසා ගෝලීය තෙල් මිල 50%කින් පමණ ඉහළ ගොස් ඇත. ඇමෙරිකානු බලධාරීන් පවසන පරිදි, අවශ්ය වුවහොත් ඉරාන වෙරළ තීරයට හෝ ප්රධාන තෙල් මධ්යස්ථානයක් වන ‘කාර්ග්’ දූපතට (Kharg Island) ගොඩබැසීමේ මෙහෙයුම් සඳහා ද මෙම අතිරේක බලඇණි යොදා ගැනීමට ඉඩ ඇත.
මේ අතර, ඉරානයේ නව උත්තරීතර නායක මොජ්ටබා ඛමේනි සිය පියාගේ අභාවයෙන් පසු පළමු වරට පණිවුඩයක් නිකුත් කරමින් කියා සිටියේ, නායකත්වය ඉලක්ක කර ප්රහාර එල්ල කිරීමෙන් ජනතාව බිය වැද්දීමට සතුරා උත්සාහ කළ ද ඉරාන ජාතිය එක්සත් වී සතුරාට ප්රබල පහරක් එල්ල කර ඇති බවයි. කලාපය පුරා මුස්ලිම් ජනතාව රාමසාන් උත්සවය සහ ඉරාන වැසියන් නව්රූස් නව වසර සැමරීමට උත්සාහ කළ ද, යුද වාතාවරණය හේතුවෙන් එම සැමරුම් අභියෝගයට ලක්ව තිබේ. විශේෂයෙන්ම බ්රෙන්ට් වර්ගයේ බොරතෙල් මිල බැරලයක් ඩොලර් 110 සීමාවට පැමිණීමත් සමඟ ලෝක ආර්ථිකය දැඩි කම්පනයකට ලක්වීමේ අවදානමක් මතුව ඇත.
යුද බිමේ තත්ත්වය තවදුරටත් දරුණු වෙමින් පවතින අතර, කුවේටයේ මිනා අල්-අහ්මාඩි තෙල් පිරිපහදුවට ද අද (20) ඩ්රෝන ප්රහාර එල්ල වී තිබේ. ඊශ්රායල හමුදා විසින් ටෙහෙරානයේ රජයේ ගොඩනැගිලිවලට ප්රහාර එල්ල කර ඇති අතර, ඉරාන බුද්ධි අංශ ප්රධානියා ඇතුළු ඉහළ නිලධාරීන් රැසක් ඝාතනය කර ඇති බව තහවුරු වේ. මීට ප්රතිචාර වශයෙන් ඉරාන විප්ලවීය ආරක්ෂක බලකාය විසින් ටෙල් අවිව් සහ හයිෆා නගර ඉලක්ක කර මිසයිල ප්රහාර එල්ල කළ අතර, බහරේනයේ පිහිටි ඇමෙරිකානු කඳවුරුවලට ද ප්රහාර එල්ල කර ඇති බව වාර්තා වේ. මෙම දරුණු ගැටුම් හේතුවෙන් මේ වන විට පුද්ගලයන් දහස් ගණනක් මියගොස් මිලියන සංඛ්යාත පිරිසක් අවතැන් වී සිටිති.
