ශ්රී ලංකාව තුළ පුනර්ජනනීය බලශක්ති ප්රභවයන් ප්රවර්ධනය කිරීමේ අරමුණින් බලශක්ති අමාත්යාංශය මගින් ක්රියාත්මක කරන සුවිශේෂී ව්යාපෘති කිහිපයක වත්මන් ප්රගතිය සමාලෝචනය කිරීමේ විශේෂ සාකච්ඡාවක් මාර්තු 19 වැනිදා පාර්ලිමේන්තු පරිශ්රයේදී පවත්වා තිබේ. මෙහිදී විශේෂයෙන්ම සුළං සහ සූර්ය බලශක්ති ව්යාපෘති මෙන්ම ජලාශ මත ඉදිකරන පාවෙන සූර්ය පැනල ව්යාපෘති කෙරෙහි වැඩි අවධානයක් යොමු වී ඇත. මෙම ව්යාපෘති සාර්ථක කර ගැනීම සඳහා පරිසර අමාත්යාංශය හරහා ලබා දිය යුතු දායකත්වය සහ අනුමැතිය ලබා ගැනීමේ ක්රියාවලිය පිළිබඳව ද මෙහිදී දීර්ඝ ලෙස සාකච්ඡා කෙරිණි.
බලශක්ති අමාත්යාංශය සහ පරිසර අමාත්යාංශය ඒකාබද්ධව මෙම ව්යාපෘති කඩිනමින් අවසන් කිරීම සඳහා ගත හැකි පියවර හඳුනාගෙන ඇති අතර, ඒ සඳහා අදාළ ආයතන වෙත වගකීම් පැවරීම ද මෙහිදී සිදු විය. ජාතික පද්ධති ක්රියාකරු (NSO) පෞද්ගලික සමාගම සහ ශ්රී ලංකා සුනිත්ය බලශක්ති අධිකාරිය එක්ව ක්රියාත්මක කරන මෙම මෙහෙයුම් හරහා ජාතික විදුලි පද්ධතියට පුනර්ජනනීය බලශක්තිය වේගයෙන් එක් කිරීමට අපේක්ෂිතය. මෙමගින් විදුලි උත්පාදන පිරිවැය අවම කර සාමාන්ය විදුලි පාරිභෝගිකයාට වැඩි මූල්ය සහනයක් ලබා දීම රජයේ මූලික අරමුණ වී තිබේ.
බලශක්ති අමාත්ය කුමාර ජයකොඩි මහතා සහ පරිසර අමාත්ය ධම්මික පටබැඳි මහතාගේ ප්රධානත්වයෙන් පැවැති මෙම හමුවට බලශක්ති නියෝජ්ය අමාත්ය අර්කම් ඉල්යාස් මහතා ඇතුළු අමාත්යාංශ ලේකම්වරුන් සහ උසස් නිලධාරීන් රැසක් සහභාගී වූහ. රටේ බලශක්ති ස්වයංපෝෂිතභාවය ඇති කිරීම උදෙසා ක්රියාත්මක මෙම මහා පරිමාණ ව්යාපෘතිවල බාධාවන් ඉවත් කර ඒවා නියමිත කාලයට නිම කිරීම සඳහා නිලධාරීන්ට අවශ්ය උපදෙස් ද මෙහිදී ලබා දෙන ලදී. මෙය ඉදිරි වසර කිහිපය තුළ ශ්රී ලංකාවේ බලශක්ති ක්ෂේත්රයේ දැවැන්ත පෙරළියක් ඇති කරනු ඇතැයි බලධාරීහු විශ්වාසය පළ කරති.
උපුටා ගැනීම: ශ්රී ලංකා පාර්ලිමේන්තුව
