යුරෝපය තුළ ප්රහාර එල්ල කිරීමේ අරමුණින් හමාස් සංවිධානයේ උපදෙස් මත රහසිගත අවි ගබඩා පවත්වාගෙන ගිය පුද්ගලයින් සිව්දෙනෙකුට ජර්මනියේ බර්ලින් අධිකරණයක් මගින් ඊයේ (2026 මාර්තු 25) වසර හතරේ සිට හය දක්වා සිරදඬුවම් නියම කරන ලදී. වයස අවුරුදු 36 ත් 58 ත් අතර පසුවන මොවුන් විදේශීය ත්රස්තවාදී සංවිධානයක සාමාජිකයින් ලෙස කටයුතු කර ඇති බවට අධිකරණය හමුවේ වරදකරුවන් විය. බර්ලින් නුවර පිහිටි ඊශ්රායල තානාපති කාර්යාලය සහ බටහිර ජර්මනියේ පිහිටි ඇමරිකානු ‘රම්ස්ටයින්’ (Ramstein) හමුදා මධ්යස්ථානය වැනි ස්ථාන ඉලක්ක කර ගනිමින් ප්රහාර එල්ල කිරීම සඳහා මෙම අවි භාවිතා කිරීමට සැලසුම් කර තිබූ බව පැමිණිලි පාර්ශවය මෙහිදී අනාවරණය කළේය.
මෙලෙස දඬුවම් නියම වූ පිරිස අතර ලෙබනනයේ උපන් අබ්දෙල්හමීඩ් අල් ඒ. (Abdelhamid Al A.) සහ ඊබ්රාහිම් එල් ආර්. (Ibrahim El R.) යන අය ද, ඊජිප්තු ජාතිකයෙකු වන මොහොමඩ් බී. (Mohammed B.) සහ ඕලන්ද ජාතිකයෙකු වන නසීහ් ආර්. (Nazih R.) යන අය ද වෙති. මොවුන් 2023 දෙසැම්බර් මාසයේදී අත්අඩංගුවට ගනු ලැබුවේ ගාසා තීරයේ යුද්ධය ආරම්භ වී සති කිහිපයකට පසුවය. මොවුන් යුරෝපය පුරා විසිරී ඇති යුදෙව් සහ ඊශ්රායල ඉලක්ක වෙත ප්රහාර එල්ල කිරීම සඳහා අවශ්ය අවි ආයුධ භූගතව සඟවා තැබීම සහ නඩත්තු කිරීම සිදුකර ඇති බව ප්රධාන විනිසුරු ඩොරිස් හුෂ් (Doris Husch) මහත්මිය ප්රකාශ කළාය.
විමර්ශනවලදී හෙළි වූ තොරතුරුවලට අනුව, බර්ලින් නුවර අවන්හලක් පවත්වාගෙන ගිය ඊබ්රාහිම් එල් ආර්. නමැත්තා 2019 වසරේදී බල්ගේරියාවට ගොස් අවි ආයුධ සහිත පෙට්ටියක් එහි රහසිගතව වළ දමා තිබේ. එමෙන්ම ඩෙන්මාර්කයේ පිහිටි තවත් අවි ගබඩාවක සිට ජර්මනිය වෙත ගිනි අවියක් රැගෙන ඒමට ද ඔහු කටයුතු කර ඇත. මෙම නඩු තීන්දුවත් සමඟ ජර්මනිය ඇතුළු යුරෝපා රටවල් සිය අභ්යන්තර ආරක්ෂාව තර කිරීමටත්, අන්තවාදී කණ්ඩායම්වල රහසිගත ක්රියාකාරකම් පිළිබඳව වැඩිදුර විමර්ශන පැවැත්වීමටත් පියවර ගෙන තිබේ.
