ඇමෙරිකාව සහ ඉරානය අතර පවතින යුදමය වාතාවරණය හේතුවෙන් ගෝලීය ඉන්ධන සැපයුමට එල්ල වී ඇති බාධා සැලකිල්ලට ගනිමින්, ඉන්දීය රජය පෙට්රල් සහ ඩීසල් සඳහා පනවා තිබූ විශේෂ අතිරේක සුරාබදු (SAED) වහාම ක්රියාත්මක වන පරිදි අඩු කිරීමට පියවර ගෙන තිබේ. ඉන්දීය මුදල් අමාත්යාංශය ඊයේ (2026 මාර්තු 26) නිකුත් කළ නිවේදනයකට අනුව, පෙට්රල් ලීටරයක් සඳහා රුපියල් 13ක්ව පැවති විශේෂ සුරාබද්ද රුපියල් 3 දක්වා අඩු කර ඇති අතර, ඩීසල් ලීටරයකට පනවා තිබූ රුපියල් 10ක බද්ද සම්පූර්ණයෙන්ම (ශුන්ය දක්වා) ඉවත් කර ඇත.
පවතින යුද තත්ත්වය හමුවේ තෙල් සමාගම්වලට සිදුවන පාඩුව අවම කිරීම සහ පොදු මහජන යහපත උදෙසා මෙම තීරණය ගත් බව රජය පවසයි. කෙසේ වෙතත්, මෙම බදු කපා හැරීම හේතුවෙන් ඉන්ධන පිරවුම්හල්වල සිල්ලර මිලෙහි (Pump prices) වහාම වෙනසක් සිදු නොවනු ඇති බව ආර්ථික විශ්ලේෂකයෝ පෙන්වා දෙති. මීට අමතරව, ගුවන් යානා ඉන්ධන (ATF) සඳහා ද විශේෂ බදු සංශෝධන කිහිපයක් හඳුන්වා දී තිබේ.
