ෆිලිපීන පේසෝ මුදල් ඒකකය අද (මාර්තු 27) ඉතිහාසයේ වාර්තා වූ අවම අගය දක්වා පහත වැටී තිබේ. අද මධ්යහ්න වන විට එක් එක්සත් අරාබි එමීර් රාජ්යයේ ඩිරාම් (Dh 1) එකක් සඳහා පේසෝ 16.48ක අගයක් වාර්තා වූ අතර, මෙය මැදපෙරදිග වෙසෙන ෆිලිපීන විදේශිකයන්ට සිය මව් රටට මුදල් යැවීමේදී වැඩි වාසියක් අත්කර දුන්නද එරට අභ්යන්තර ආර්ථිකයට දැඩි බලපෑමක් එල්ල කර ඇත.
පේසෝ මුදල් ඒකකය මෙලෙස දුර්වල වීමට ප්රධානතම හේතුව වී ඇත්තේ මැදපෙරදිග පවතින යුද වාතාවරණය හමුවේ ලෝක වෙළඳපොළේ තෙල් මිල ඉහළ යාමයි. ෆිලිපීනය ඉන්ධන ආනයනය මත බෙහෙවින් යැපෙන රටක් බැවින් පසුගිය මාසය තුළ එරට ඉන්ධන මිල දෙගුණයකින් ඉහළ ගොස් තිබේ. මේ හේතුවෙන් එරට උද්ධමන වේගය 5.1%ක් දක්වා ඉහළ යනු ඇතැයි මධ්යම බැංකුව පුරෝකථනය කර ඇති අතර, මෙය ඔවුන්ගේ ඉලක්කගත මට්ටමට වඩා බෙහෙවින් වැඩි අගයකි.
මෙවැනි ඉහළ උද්ධමනයක් පවතින අවස්ථාවක සාමාන්යයෙන් පොලී අනුපාත ඉහළ නැංවුවද, ෆිලිපීන මධ්යම බැංකුව සිය පොලී අනුපාත 4.25% මට්ටමේම පවත්වා ගැනීමට තීරණය කිරීම ආර්ථික විශ්ලේෂකයන්ගේ පුදුමයට හේතු වී තිබේ. මෙම ආර්ථික අස්ථාවරත්වය හේතුවෙන් ෆිලිපීනයේ ජීවන වියදම සීඝ්රයෙන් ඉහළ යමින් පවතින අතර, එය ආසියානු කලාපයේ අනෙකුත් නැගී එන ආර්ථිකයන් කෙරෙහි ද වක්ර බලපෑමක් එල්ල කළ හැකි බව පෙනී යයි.
