එජාපයේ මහලේකම්ගේ යෝජනාව අස්සේ කුමන්ත්රණයක් – මන්ත්රි නිරෝෂන්
![](https://ttvnews.lk/wp-content/uploads/2024/05/Niroshan_TTVnews.jpg)
ජනාධිපතිවරණය සහ මහ මැතිවරණය වසර 2කට කල් දැමීමටත්, අවශ්ය නම් ඊට අදාළ යෝජනාව පාර්ලිමේන්තුවට ඉදිරිපත් කර ජනමත විචාරණයකට යාමටත්, එක්සත් ජාතික පක්ෂය කළ යෝජනාව පිටුපස දේශපාලන කුමන්ත්රණයක් ඇති බව සමගි ජනබලවේගයේ විදේශ කටයුතු ලේකම් , පාර්ලිමේන්තු මන්ත්රී නිරෝෂන් පෙරේරා මහතා පවසයි.
මන්ත්රිවරයා මේ බව පැවසුවේ අද (30) කොළඹ විපක්ෂ නායක කාර්යාලයේ පැවැති මාධ්ය හමුවට සහභාගි වෙමිනි.
එක්සත් ජාතික පක්ෂයේ මහ ලේකම් පාලිත රංගේ බණ්ඩාර මහතා සිදුකළ මෙම ප්රකාශය හරහා ජනාධිපති රනිල් වික්රමසිංහ මහතාට තිබුණ ජන පදනමටත් හානි වන බව නිරෝෂන් පෙරේරා මහතා කියා සිටියේය.
එමෙන්ම පොලිස් ආඥා පනත අනුව නොව ආණ්ඩුක්රම ව්යවස්ථාව අනුව රට තුළ ප්රජාතන්ත්රවාදී මැතිවරණයක් පැවැත්වීමට රජය කටයුතු කළ යුතු බවත් නිරෝෂන් පෙරේරා මහතා පැවැසීය.
වැඩිදුරටත් අදහස් දැක්වූ පාර්ලිමේන්තු මන්ත්රී නිරෝෂන් පෙරේරා මහතා ‘‘එක්සත් ජාතික පක්ෂයේ මහ ලේකම් පාලිත රංගේ බණ්ඩාර මහතා ජනාධිපතිවරණය සහ මහ මැතිවරණය වසර දෙකකින් කල් දැමිය යුතුයි කියන ප්රකාශයට විශාල විරෝධයක් රට තුළ මතුවෙලා තිබෙනවා. මෙම ප්රකාශය දේශපාලනිකව විශාල ගින්නක් ලෙස පැතිර ගොස් තිබෙනවා. ඒ වගේම පාලිත රංගේ බණ්ඩාර මහතා විසින් සිදුකළ ප්රකාශය දේශපාලන කුමන්ත්රණයක් ලෙස තමයි සමගි ජනබලවේගය දකින්නේ. හිතාමතාම දේශපාලන වශයෙන් රට වියවුලකට පත් කරන්නත් , රටේ තිබෙන ප්රශ්න ජනතාවට අමතක කරවන්න මෙවැනි දේශපාලන කුමන්ත්රණ දෙසට ජනතාවගේ අවදානය යොමු කරවන්නට එක්සත් ජාතික පක්ෂයේ මහ ලේකම් කටයුතු කර තිබෙනවා. ජනාධිපතිවරයාට තිබුණ ඡන්ද පදනමත් නැති වීමට එක්සත් ජාතික පක්ෂයේ මහ ලේකම් පාලිත රංගේ බණ්ඩාර මහතා සිදුකළ ප්රකාශය බලපානවා. පාලිත රංගේ බණ්ඩාර මහතාව කැඳවලා ඔහු කළ ප්රකාශය සම්බන්ධයෙන් පියවරක් ගැනීමට ජනාධිපති රනිල් වික්රමසිංහ මහත්තයා අපොහොසත් වී තිබෙනවා. එක්සත් ජාතික පක්ෂය කපුටන් සමඟ ඩීල් දේශපාලනය කරන බලවේග අද වනවිට ක්රියාත්මක වෙලා තිබෙනවා. කපුටට අවශ්ය වෙලා තිබෙන්නේ මහ මැතිවරණයක් පවත්වන්න. නමුත් මහ මැතිවරණයක් පවත්වන්න නොහැකි තත්ත්වයක් ඇති වෙලා තිබෙනවා. එක්සත් ජාතික පක්ෂයේ මහ ලේකම් පාලිත රංගේ බණ්ඩාර මහතාගේ ප්රකාශය පිටුපස කපුටත් ඉන්නවා කියලා සැකයක් මතුවෙනවා. පාලිත රංගේ බණ්ඩාර මහතාගේ ප්රකාශය හේතුවෙන් ජනතාව මැතිවරණයක් ඉල්ලලා පාරට බසින තත්ත්වයක් අද ඇති වෙලා තිබෙනවා. පොලිස් ආඥා පනත අනුව නෙවෙයි මැතිවරණය පැවැත්විය යුත්තේ. ව්යවස්ථාව අනුව තමයි මැතිවරණයක් පැවැත්විය යුත්තේ. ඒ වගේම ආණ්ඩුක්රම ව්යවස්ථාවට අනුව ප්රජාතන්ත්රවාදී මැතිවරණයක් රට තුළ පැවැත්වෙයි කියලා රටේ පොදු මහජනතාව බලාපොරොත්තු වෙනවා. රටේ තිබෙන ප්රශ්නය පෙන්වලා මැතිවරණ කල් දැමීමට ආණ්ඩුව උත්සහ කළොත් රටේ ජනතාව ඒ සඳහා කිසිසේත් එකඟ වෙන්නේ නෑ. රටේ ප්රජාතන්ත්රවාදය ආරක්ෂා කරන්න රටේ ජනතාව සමඟ සමගි ජනබලවේගය හිට ගන්න සුදානම්. ‘‘යැයි පාර්ලිමේන්තු මන්ත්රී නිරෝෂන් පෙරේරා මහතා වැඩිදුරටත් කියා සිටියේය.