“ඔබට ගෙයක් – රටට හෙටක්” ජාතික නිවාස වැඩසටහන යටතේ ගම්පහ, පරගොඩ දකුණ ප්රදේශයේ පදිංචි කථනාබාධිත (ගොළු) පවුලකට නව නිවසක් ලබා දීම ග්රාමීය නිවාස හා ඉදිකිරීම් සහ ගොඩනැගිලි ද්රව්ය කර්මාන්ත ප්රවර්ධන රාජ්ය අමාත්ය ඉන්දික අනුරුද්ධ මහතාගේ ප්රධානත්වයෙන් ඊයේ (10) දින සිදු කෙරිණි.
මෙම පවුලේ ආච්චි, සීයා, මව, පියා සහ දරු දෙදෙනා යන සාමාජිකයින් සියලු දෙනා උපතින්ම කථනාබාධිතයි.
මෙහිදී අදහස් දැක්වූ ඉන්දික අනුරුද්ධ අමාත්යවරයා, “යුධ සමයේදී රට තුළ වළලා ඇති බිම්බෝම්බ සම්පූර්ණයෙන්ම ඉවත් කළහොත් ඇතැම් රාජ්ය නොවන සංවිධානවලට මෙරට තුළ පැවැත්මක් නොමැති වන නිසා එම සංවිධාන විසින් බිම්බෝම්බ නොමැති ප්රදේශවල බිම්බෝම්බ වළලමින් ඔවුන්ගේ ව්යාපාර හා පැවැත්ම තහවුරු කර ගැනීමට කටයුතු කරමින් සිටිනවා. උතුරු නැගෙනහිර ප්රදේශවල නැවත පදංචි කිරීමේ කටයුතු නිවාස අමාතංශය හරහා සිදු වන හෙයින් ඒ පිළිබද තොරතුරු අපට දැන ගන්නට ලැබී තිබෙනවා. ලෝකයේ ඕනෑම රටක රාජ්ය නොවන සංවිධාන පවතින්නේ ඔවුන් ක්රියාත්මක කරන ව්යාපෘති අනුවයි. ඇතැම් සංවිධාන මෙරට ජාතින් අතර ඇණකොටාගැනීමට කටයුතු කර ඔවුන්ගේ ව්යාපාර පවත්වා ගෙන යාමට ක්රියා කරනවා” යනුවෙන්ද අමාත්යවරයා වැඩිදුරටත් පැවසීය.
මෙම අවස්ථාවට ප්රදේශීය දේශපාලඥයින් සහ රාජ්ය නිලධාරීන් ඇතුලු විශාල පිරිසක් සහභාගි වූහ.
