මහා භාණ්ඩාගාරයේ නිලධාරින්ගේ මැයි මස වැටුපෙන් කොටසක් වැන්දඹු අනත්දරු ගිණුමට පරිත්‍යාග කිරීමට කටයුතු කරන බව මුදල්, ආර්ථීක සහ ප්‍රතිපත්ති සංවර්ධන අමාත්‍යංශය පවසයි.

එම අමාත්‍යංශය කියා සිටියේ කොවිඩ් 19 වෛරස් ව්‍යාප්තිය හේතුවෙන් රජයේ විදේශ ආදායම් මාර්ග මෙන්ම දේශිය ආදායම් මාර්ග අවහිර වී ඇති වාතාවරණයක් මත මාස කිහිපයක් සඳහා බලපා ඇතී ආර්ථික පීඩනය කලමනාකරණය කර ගැනීම සඳහා ජනාධිපති ලේකම්වරයා විසින් සමස්ත රාජ්‍ය සේවකයින් වෙතින් කරන ලද පෞද්ගලික ඉල්ලීමට මුදල් අමාත්‍යංශය ප්‍රමුඛ මහාභාණ්ඩාගාරයේ කාර්යය මණ්ඩලය විසින් ස්වකීය 2020 මැයි මස වැටුපෙන් කොටසක් වැන්දඹු අනත්දරු ගිණුමට පරිත්‍යාග කිරිමට පියවර ගෙන තිබෙන බවයි.

ඒ අනුව මහාභාණ්ඩාගාර ලේකම්වරයාගේ 2020 මැයි මස වැටුපෙන් සියයට 50 ක්ද, තවත් බහුතර නිලධාරින් පිරිසක් තම මැයි මස වැටුපෙන් සියයට 25 හා සියයට 10 බැගින් ද, අනෙකුත් කාර්යය මණ්ඩල සාමාජිකයින් ස්වකීය මැයි මස දිනක වැටුප ද වැන්දඹු අනත්දරු ගිණුමට බැර කර තිබෙන බව මුදල්, ආර්ථීක සහ ප්‍රතිපත්ති සංවර්ධන අමාත්‍යංශය වැඩිදුරටත් පවසා තිබේ.

 

දිලිනි සමන්මලි