දිවයින පුරා පවතින සක්රිය නිරිතදිග මෝසම් කාලගුණික තත්ත්වය හේතුවෙන් මෙරට ප්රදේශ කිහිපයකට මිලිමීටර් 300 ඉක්මවූ අතිදැවැන්ත වර්ෂාපතනයක් ඇද හැලී ඇති බව කාලගුණවිද්යා දෙපාර්තමේන්තුව අද (22) පෙරවරුවේ නිවේදනය කළේය. එම දෙපාර්තමේන්තුවේ අනාවැකි අංශයේ අධ්යක්ෂ මෙරිල් මෙන්ඩිස් මහතා සඳහන් කළේ විශේෂයෙන්ම ගම්පහ දිස්ත්රික්කයේ සහ කෑගල්ල දිස්ත්රික්කය ආශ්රිත ප්රදේශවලින් මෙම ඉහළ වර්ෂාපතන අගයන් වාර්තා වී ඇති බවයි. පවතින වායුගෝලීය තත්ත්වය මත මෙම තද වැසි තත්ත්වය ඉදිරි පැය කිහිපය තුළත් අඛණ්ඩව අපේක්ෂා කළ හැකි බව හෙතෙම පෙන්වා දුන්නේය.
ඒ අනුව බස්නාහිර, සබරගමුව, වයඹ පළාත්වලට මෙන්ම මහනුවර, නුවරඑළිය, ගාල්ල සහ මාතර දිස්ත්රික්කවලට අද දවස පුරාම විටින් විට වැසි හෝ ගිගුරුම් සහිත වැසි ඇති විය හැක. මෙම තත්ත්වය යටතේ ඇතැම් ප්රදේශවලට මිලිමීටර් 100 ත් 150 ත් අතර තද වැසි ඇතිවීමේ හැකියාවක් ද පවතී. මෝසම් තත්ත්වය විටින් විට තවදුරටත් සක්රීය විය හැකි බැවින් ඉදිරියේදී ද අධික වැසි අපේක්ෂා කළ හැකි බව කාලගුණ විද්යා දෙපාර්තමේන්තුව පවසයි. මේ හේතුවෙන් කැලණි ගඟ, කළු ගඟ සහ අත්තනගලු ඔය ඇතුළු ගංගා නිම්න ආශ්රිතව වෙසෙන ජනතාවත්, පහත්බිම් වැසියන් සහ නායයෑම් අනතුරු ඇඟවීම් නිකුත් කර ඇති කඳුකර ප්රදේශවල ජනතාවත් පවතින අවදානම හමුවේ දැඩි අවධානයෙන් යුතුව කටයුතු කළ යුතු බවට දන්වා සිටී.
