වසර 2002 සිට මේ දක්වා කාලය තුළ ආසියානු සංවර්ධන බැංකුව (ADB) විසින් උතුරු පළාතේ සංවර්ධන කටයුතු වෙනුවෙන් ඇමරිකානු ඩොලර් බිලියනයකට ආසන්න මූල්ය ආධාරයක් ලබා දී ඇති බව ADB හි ශ්රී ලංකා නේවාසික අධ්යක්ෂ ශැනන් කව්ලින් (Shannon Cowlin) මහත්මිය ප්රකාශ කළාය.
යාපනයේ ක්රියාත්මක වන මුහුදු ජලය පිරිසුදු කිරීමේ ව්යාපෘතිය සහ එහි ප්රතිලාභ ලබන යාපනය ශික්ෂණ රෝහල නිරීක්ෂණය කිරීමෙන් අනතුරුව මාධ්ය අමතමින් ඇය මෙම අදහස් පළ කළාය. 2002-2012 වසරවල ක්රියාත්මක වූ NECORD ව්යාපෘතියට ඩොලර් මිලියන 134.9 ක්, 2010-2020 උතුරු මාර්ග සම්බන්ධතා ව්යාපෘතියට ඩොලර් මිලියන 247.5 ක් සහ 2011-2014 CARE ව්යාපෘතියට ඩොලර් මිලියන 138.2 ක් ඇතුළුව උතුරේ යටිතල පහසුකම්, ජලය, මාර්ග, සෞඛ්ය සහ අධ්යාපනය නංවාලීම සඳහා මෙම ආයෝජන සිදු කර ඇති බව ඇය පෙන්වා දුන්නාය. උතුරු පළාත් ආණ්ඩුකාර නාගලිංගම් වේදනායහම් සහ යාපනය ශික්ෂණ රෝහලේ අධ්යක්ෂ වෛද්ය ටී. සතියමූර්ති යන මහත්වරුන් ද මෙම අවස්ථාවට එක්ව සිටියහ.
