2020 ඔලිම්පික් උළෙලට සහභාගී වී සිටින ශ්‍රී ලාංකේය කණ්ඩායමට අදාළ පහසුකම් ලබාදීම සඳහා ජාතික ඔලිම්පික් කමිටුව විසින් ඉදිරිපත් කළ ඇස්තමේන්තුවට අදාළ මූල්‍ය ප්‍රතිපාදනයන් එම කමිටුව වෙත ලබා දී තිබෙන බව ක්‍රීඩා සංවර්ධන දෙපාර්තමේන්තුවේ අධ්‍යක්ෂ ජනරාල් අමල් එදිරිසූරිය මහතා පවසයි.
2020 ටෝකියෝ ඔලිම්පික් උළෙල සඳහා සහභාගි වී සිටින ශ්‍රී ලාංකේය ක්‍රීඩක ක්‍රීඩිකාවන්ට අවශ්‍ය ඇඳුම් (Competition kit) ලබා දී නොමැති බවට විවිධ මාධ්‍ය ඔස්සේ පළවන පුවත් සම්බන්ධයෙන් අදහස් පළකරමින් අධ්‍යක්ෂ ජනරාල් අමල් එදිරිසූරිය මහතා මේ බව අවධාරණය කළේය.
ඔලිම්පික් ක්‍රීඩා උළෙල, පොදු රාජ්‍ය මණ්ඩලීය ක්‍රීඩා උළෙල වැනි ජාත්‍යන්තර ක්‍රීඩා උළෙල සඳහා අන්තර්ජාතික ඔලිම්පික් කමිටු නිර්දේශ මත තරගාවලි සම්බන්ධ සියලු කටයුතුවල සංවිධානය සිදු වන බවත්, ඒ අනුව ශ්‍රී ලංකාවේ ඊට අදාළ වගකීම දරනුයේ ජාතික ඔලිම්පික් කමිටුව බවත් හෙතම සඳහන් කරයි.
